Sportçuları ödüllemäk yortulu oluşu Komrat kasabasında geçti. 2025 yılın üüsek çıkışları için diplom hem para baaşışları verildilär Evropa, dünnä, hem devlet cempionatların tarayıcılarına.
Geçän 2025 — ci yıl pek zengindi ödüllerä, angılarını kazandılar avtonomiyanın sportçuları türlü sport uurlarında. Diil bir keret serbest güreşçilär, sambistlär, aar atletikacılar, şaşıstlär, boksörlar kaldırdılar devletin bayraanı halklarası arenalarda, çizgiledi Gagauziya Bakannık komiteti başı ilk yardımcısı İlya Uzun: «2025 yıl halezdän oldu bizim rayonumuz için istoriya rekordu. 250 ödül, angıları kazanıldılar millet hem da halklarası yarışmalarda. Bölä sport uurunda çıkışları gagauz avtonomiya bilmeer. Biz şükür ederiz hepsini».
Sportçuların ödüllenmesi oldu adet gibi, sportçuların çoyu ilk sıra kabletmeerlär ödülleri. Kimisi için onnardan bıldırkı yıl zordu, ama kimisinä deyni iilindi. Gagauziya Genel gençlik hem sport bakannıın başın bir vakıda işini götürän Pavel Tulba nışannadı, diil sade sportçuların becermeklerini, ama trenerlerin dä. Trenerlär koyȇrlar diil sade cananrını, ama hepsi kendi becermeklerini terbietmää deyni islä insannarı hem da becerikli sportçuları, çizgiledi Pavel Tulba: «Saygılı dostlar. İnanȇrız, ani 2026 — ci yıl belli edecek kendisini bizim sportçuların eni anılmış taramaklarınnan, angısı olacek anılmış sayfa gibi gagauz sportun istoriyasında. Bu yıl da nicä bilersiniz çeketti islä bizim regionumuz için — Kıpçak küüyü güreş okulun terbiedeni Aleksandr Gaydarlı oldu Evropa çempionu gençlerin aralarında».
«Biz hodullanȇrız sizinnän. Çok saa olasınız sizin sport uurunda diil kolay çalışmanız için. Belli bişey, ani trenerlerin becermeklerinä görä, onnarın derin fikirlerinä, işin götürmesinä — siz etiştiniz bu üüsek çıkışlara»,- GHT viţe-spikeri Georgiy Leyçu nışannadı.
«Bu uşaklar, angıları zanaatlanȇrlar her gün. Kendi becermeklerinä görä etişerlär bölä üüsek çıkışlara. Bizim okulumuza biraz taa zeedä iki yıldan, ama bu kısa zamanın içindä biz etiştik islä çıkışlara. Okul sayılȇr bir en islä şaşki — şahmata okulu MD»,- İvan Velikoglo Gagauziya şaşki — şahmata klubu başı işini bir vakıda götürän.
Kendi üüsek çıkışları içn 2025 — ci yılda halklararası hem millet sport yarışmalarında, ilk sıra baaşışlandı Çadır — Lunga kasabasının yaşayanı, Papalimpiya komitetin temsilcisi MD üülen tarafında Marianna Tihu: «Çok saa olasınız bu ödül için. Sportçu için — bu büük baaşış. Bu yol diildi kolay.İsteerim sölemää, ani her zaman, açan bän kazanȇrım nesoysa ödülü — altın mı, gümüş mi — bu büük hodulluk, açan senin adın öttüktän sora kaldırılȇr Gagauziya bayraa. Ko benim örnääm sizi kaavileştirsin gitmää ileri, da verilmemää».
Ödülleri kablettillär 400 zeedä sportçu hem trener bütünnä Gagauziyadan — 2025 — ci yılın Evropa, dünnä, hem devlet cempionatların tarayıcıları.
Moldovanın hem Gagauziyanın en mekalı haberleri GRTnın Telegram kanalında!