Moldova devleti Şannı artistin Petkoviç Pötrinin yıldünümünä adalı konţert Çadır-Lunga Kultura merkezi salonunda geçti. Kutlamaa maestruyu geldilär onun dostları hem yakındakıları.
MD hem Gagauziya Şannı artisti Pötr Petkoviç bu yıl 60-cı yıldönümünü nışannadı . Bu yılların 40-nı o sţenada çalışarak türkücülää baaşladı, açıp gagauz muzikacılıının eni bir sayfasını. Kutlamaa onu bu gözäl günnän geldilär onun yakındakıları, dostları hem Gagauziya kuvet temsilcileri.
«40 yildan zeedä si̇z geti̇rersi̇ni̇z sevi̇nmeli̇k herbir insana, angısı yaşȇȇr diil sade Gagauziyada, ama Moldovada hem da Moldova dolayında. 40 yıldan zeedä herbir türküsünü, angısını insan işitti ,herbir türkü kalbindä kalȇr»,- nışannadı başkan.
GHT başı Dmitriy Konstantinov nışannadı, ani Pötr Petkovicin yaratmaları yaşayannarda patriotizma duygularının terbiederlär.
«Bütün ürektän isteerim kutlamaa bizim Pötr Petkoviçi ȇstrada maestrosunu. Dileerim sizä uzun ömür hem sade ileri» ,- dedi spiker Konstantinov.
Yortulu avşam önemni oldu diil sade Petkoviçin türkülerini sevennerinä deyni, ama bütün regiona deyni dä.
«İsteerim şükür etmää Allaha, ananıza-bobanıza, ani vermişlär yaşamak sizä hem baaşlamışlar sizi Gagauziyaya. Herbir işi, angısını yapȇr Pötr İvanoviç , o yapȇr bütün ürektän. Okadar sevmää kendi halkını, gagauzların adetlerini, dilini, kulturasını hepsi becermeer. Ölä, nesoy yapȇr bunu Pötr İvanoviç, var nicä bizä örnek olsun»,- dedi Semönova.
Olayın süresindä Pötr Petkoviça Gagauziya Kultura bakannıınnan baaşlanıldı onun yaratma kiyadı.
«Yarım yıl geeri söledi bizä, ani kiyadı yokmuş, biz dä alındık bu iştän, dä tä büün gagauzların, bakannıın, başkanın adından sizä bu kiyadı başlȇȇrız» ,- ekledi Kultura bakanı.
Pötr Petkoviç-Gagauziyanın anışlmış türkücüsü. Büün onun yaratmalarını sesleerlär hem severlär dill sade Gagauziyanın hem Moldovanın yaşayannarı, ama aşırı devletlerin kultura sevenneri dä.
«Taa biz sıra isteerim sölemää benim siiredicilerimä saa olsunnar, ani herzaman benimnän barabar, bu avşamı geçirdilär benimnän barabar. Dostlarımnan bän ilerleerim ileri. İnsanar da, angıları beenerlär benim türkülerimi ,vererlär bana energiya hem sora bu energiyayı bän onnara çevirerim»,- nışannadı Pötr Petkoviç.
Yaratmak olunda Pötr İvanoviç çok yardım etti genç türkücülerä dä, yardım edip onnara kalkmaa ayaa hem dünnää sţenalarına çıkmaa.
«Pötr İvanoviç Gagauziyanın hepsi artistlerinä deyni örnek, o hepsinä çok yardım etti, bana da ölä. Biz ona bakarkan, savaşȇrız olmaa onun gibi».
«Bizi muzika birleştirdi. Hem onun hatırınnan biz büün dostluk ederiz. Onun uuru — o bizim professional uurumuz».
Petkoviç Pötrinin yıldönümünä konţerdi Çadır-Lunga kasabasında Kultura merkezin salonunu siiredicilärlän doldurdu. Sţenadan öttülär maestronun eni yaratmaları da.