Beşalma küüyündä yaşȇȇr hem yaradȇr genç bir resimci Nikolay Kuru-insan, angısına deyni resimcilik diil sade incäzanaat, ama dolaylarlan dialog kurması hem kendini gerçeklemäk kolaylıı oldu. Çok maanalı hem türlüformalı dünnedä, o ayırȇr serbestlii. Serbestlii incäzanaatın sonsuzluunda hem duygularının açıklamasında.
Nikolay Kuru duudu hem büüdü Beşalma küüyündä. Başlankı klaslarda üürenärkenä, o, nicä dä onun akrannarı incäzanaat uurunda özel becermeklerininnän ayırılmazdı, ama başlayarak 5-ci klastan, onun resimneri başlȇȇrlar dikkatlık üüredicilerin hem başka üürenicilerin tarafından çekmää, nışannȇȇr Nikolay: «Benim resimnerin başlankı klaslarda başkalarından pek ayırılmazdılar, 5-ci klasta şansora başladılar ayırılmaa, benim bobam resimnäärdi-onun vardı kendi resimneri, evdä yapardık bu işleri. Küçüktän taa başlȇȇrsın bununnan zanaatlanmaa, plastilinnän çok işläärdi, onuştan yavaş-yavaş ilerlemää bu uurda başladım».
Nikolay annadȇr, ani incäzanaat ona deyni-o büük bir kolaylık lafsız lafetmää. Kendisi için annatmaa pek sevmeer. Bakmayarak ona , ani bobası zanaatlanardı resimnemäklän , Nikolay sayȇr, ani incäzanaat uurunda başarılara sade izmetlän etişmää var nicä.
«Bän düşünerim, ani kişiyä bu iş geler yaşarkana. Bu herbirin içindä var. Herbir kişinin baalantısı incäzanaatlan var . Kimisi ilerleder görüp, ani sever neylänsä zanaatlanmaa, kimisi ama başka işleri sever. Ana- boba sana bir nasaat var nicä versin hem örnek sana işindä göstersin»,- resimci annattı.
Universitettä interyer dizaynerı başardıktan sora Nikolay birkaç yıl aşırıda kendini gerçeklemää deneer, ama, çok geçmeer, da o kendi Ana topraana Beşalmaya dönmää karar verer. Burada da, resimci olarak, ilk proektlerini gerçeklemää başlȇȇr.
«Bän çekettim grafitiylän zanaatlanmaa, yaptım mural , gördülär başka küüylerdän insannar . Primarlarlan buluştum, onnar istedilär bölä resimneri kendi küüuylerindä. Çok işleri biz duvarlarda yaptık»,- Nikolay annaattı.
Büün Nikolay keramikaylan da zanaatlanȇr. Onun ellerindä türlü heykillär duȇrlar-herbirinin var kendi özelii, harakteri. İşleyeräk çamurlan resimci duygularını formaylan açıklȇȇr, bundan unikal süretlär peydalanȇrlar.
«Bän çekettim ellärlän işlemää, küçüklüümdän işläärdim plastilinnan, ama bu material ayırılȇr. Sora , yıllarlan biz geldik ideyaya, ani var nicä yapmaa bişey büst gibi »,- resimci ekledi.
Nikolayın görgüsü dünneyä hem yaradıcılaa başkalarından ayırılȇr, ama büün onun el yaratmalarını severlär hem onnar cümnedä sorumnu olȇrlar, nışannadı el ustası Pötr Kapaklı.
«Cümnä şansora kableder onu . Bän gördüm sergidä, nicä başkaları bakȇrlar onun işinä , nicä tanȇȇrlar onu. Kolidä ideyä çok var, onun işini uşaklar da gelip siyrederlär hem ondan çok iş üürenerlär»,- Pötr Kapaklı nışannadı.
Nikolayın büünkü yaratmalarının ardında-yılların çüpesi hem yannışlıkları bulunȇrlar. Onun yaratmaları –diil cuvap, ama soruşlar, angılarını herbir insan kendi-kendisinä sorȇr. O biler hem inanȇr, ani incäzanaat lääzım olsun hem yaşasın insannarın arasında.
Avtor: A. Terzi, operator: S. Georgiev, montaj: M. Kazaku
Moldovanın hem Gagauziyanın en mekalı haberleri GRTnın Telegram kanalında!