Gagauziyanın çiftçi çorbacılıkları ilerlederlär kır işlerini da çekettilär ekmää semiçkayı hem başka kulturaları. Bizim televizion grupamız bulundu Kirsovo hem Çok — Maydan küülerin çiftçilerindä. Bizim korespondetımız üürendi, nicä kışladılar güzlüklär hem nesoy tehnologiyaları kullanȇrlar büütmää deyni ii bereketi.
Kurşunji Viktorun çorbacılıında Kisrsovo küüyündän işleniler 655 ektar, neredä ekerlär boodayları hem sürmäk kulturalarını.
Güzdän ekiliydi 165 ektar raps, 115 ektar ekin, ilkyazın plana koyuldu ekmää papşoy hem 205 ektar semiçka. Nicä urguladı agrariy , bu yıl güzlüklär kışladılar ii, ama büüsünnär deyni lääzım nemnik toprakta.
«Kışladılar pek ii, makar bizdä hiç yoktu kaar, hem yoktu kaavi ayazlar da. Ekin geçirdi suuku, raps hep ölä, ama nemnik bizä etişmeer. Büün bizdä bir metra toprakta meteostanţiyanın haberlerinä görä kırda 85 milimetra ekindä, rapsta 100 milimetra. Striptilda 115 yakın»,- urguladı agrariy.
Bitki yılların kuraklıı getirer ona, ani çoyu agrariyalar geçerlär eni tehnologiyalara sürmää deyni topraa, ki korumaa nemnii erdä hem zeedeletmää bereketi. Bu iş için kullanȇrlar minitil, striptil hem noutil. Onnara görä topraa hiç sürmeerlär yada sade 15 santimä er içinä girerlär.
«Hepsini lääzım düşünmää , bakmaa nesoy ne bizdä kırda kalȇr bümnerdän sora, da ozaman kararlamaa kulanmaa ni-tiil, strip-till, erlem onnar uymarsa ozanam eskileri kullanȇrız. Ama şindi görerim, ani arrtırmaa deyni faydalı mini-till hem sprip-tiilın kullanması»,- urguladı agrariy.
«Siz görersiniz merayı, geçtim düz ekmeyä, iki yıl işledim mini-tillan, az geçtim disklan 5-6 santimä, bundan sora ektim. Geçän yıldan kullanȇrım düz ekmäk tehnologoiyasını. Umutlanȇrım, ani bir -iki yıldan sora heptän geçecäm no-tilla, ki korumaa nemnii toprakta»,- urguladı agrariy .
Agrariyaların bir payı kuraklıın beterinä savaşȇrlar ekmää başka kulturaları, angıları dayanȇrlar sıcaa, nicä keten, sorgum, hardal. Viktor kalȇr taa adetça büümnerdä.
«Herbir agrariy kendisinä deyni kararlȇȇr, nesoy kulturaları ekmää, biz dä kullanȇrız 4 meralı ekmeyi. Bu raps, ekin, semiçka hem papşoy. Kalȇrız taa bu büümnerdä, plannamȇȇrız diiştirmää. Dolayda insannar ekerlär keten semiçkanın erinä»,- Viktor urguladı.
«Nut, mercimek, fasülä, bu pek ii, ama Moldovanın poyraz tarafına deyni, nerdä taa çok nemnik. Bizdä goroh. 20 yıldan zeedä onu ekeriz , en kuraklık yıllarda iki-üç ton alȇrız. Bununnan var nasıl çıkalım. Rapiţa ii yıllarda 9 leya sattıynan hem iki-üç ton topladıynnan , var nasıl harcamakları çıkaralım hem insannarlan da ödeşelim»,- Pötr urguladı.
Moldovanın meteoizmetin uzmannarın haberlerinä görä ayaz hava var nasıl kötü belli etsin kendisini çiftçilik kulturalarında. Meyva fidannarı, angıları çiçek açȇrlar hem baalar, angıların tomurcukları var nasıl dolsunnar 3 gradus suukta. Booday kulturalarına deyni bu ayaz diildi korkunçlu.
Moldovanın hem Gagauziyanın en mekalı haberleri GRTnın Telegram kanalında!