Ak perşembä, angısı 2026 -c i yılda düşer aprelin 9 — da sayılȇr bir en önemni gün Paskellä orucun karannık aftasında. Bu vakıt getirmää aklımıza saklı avşamı, paklamaa evin içini, hazırlanmaa yortuya hep ölä duva etmää hem pişman olmaa yaptıklarımız için. Bu gün dolu deerin maanaylan hem adetlärlän, angılar ıyardımcı olȇrlar inancılara hazırlanmaa deyni Paskelleya — İisus Hristozun dirilmesinä.
Ak perşembä günündä sayılȇr, ani maasuz lääzım gitmää kliseyä, neredä geçerlär özel dualar, angıları adalı Kurtarıcının İisus Hristozun çirkin zeetlerinä. İnancılar savaşȇrlar bulunmaa paalı, önemni hem lääzımnı duvalarda, hem kabletmää Ayozlu komkayı, çizgiledi Komrat kasabası Ayozlu İliya klisesi izmetçisi, protoiyerey Födor: «Ak perşembä — pek önemni gün, neredä okunȇrlar hepsi 12 Evangeliyalar, neredä hepsi dört Evangelist geçirerlär çirkin hem kötü zeetleri, angılarını İisus Hristos kableti bizim için. Bizim için ortodoks hristiannar için, açan biz işideriz, sesleriz, annȇȇrız, da açan biz kablederiz zeetlerin bir parçasını üüremizä — biz lääzım kaavileşmää inanda».
Ak perşembä çaarȇr inancıları, diil sade paklasınnar evlerini, ama ilk — paklasınnar kendi cannarını — duva edip hem pişman olup. Bu gün hep ölä inancılar çekederlär hazırlanma Paskelleya. Çorbacıykalar pişirerlär kozanak, paska, boyȇrlar yımırta hem da hazırlȇȇrlar başka yortulu imekleri. Pek önemni, yapmaa bu işleri pak fikirlärlän, çizgiledi protoierey Födor: «Ak perşemä günündä, açan biz geleriz kliseyä, biz durȇrız İisus Hristozun Kruçada gerilmesindä, da açan biz işideriz, da çekederiz annamaa, gözlerimizin önündä görünerlär bu çirkin zeetlär, angılarını çekti Kurtarıcı. Bu bizim için okulların — okulu. Bunnar islä üürenmeklär, sık çedekederiz annamaa, kimiz biz ortodoks hristiannarı. Da benim pek canımı acıdȇr, açan insannar söleerlär, ani onnarın yok vakıtları kliseyä gelmää».
Ak preşermbä — bu vakıt, canını paklamak için hem da hazırlanmaa deyni Paskelleya — İisus Hristozun dirilmesinä.Bakıp bu günün adetlerini, insannar var nasıl paklasınnar kendi cannarını hem da evlerini, ki büük sevinmeliklän karşılama İisus Hristozun dirilmesini.
Moldovanın hem Gagauziyanın en mekalı haberleri GRTnın Telegram kanalında!