Gagauz horusunnan, çiçeklärlän, Moldova hem Gagauziya bayraklarınnan karşıladılar Gagauziyanın girişindä dünnä çempionu veterannarın aralarında Dmitriy Malenkovu. Nicä urguladı sportçu, bu kıpım ona pek dalgalı, çünkü bu onun ilk ölä üüsek uurda ödülü.
«Gittim dünnä çempionatına, kazandım ödülü. Çok gittim bu ödülä, bu adıma. Saa ol hepsiciinä, kim geldi beni karşılamaa. Hepsini şükür ederim»,- annattı Dmitriy.
Nicä söleerlär, erdä bulunan taşın altına su akmȇȇr. Ölä sportta da. Erlim hergün sınışları geçirmärsän hem koymarsan bütün kuvedini, çıkışına etişmeyecän, bakmayarak yaşlara. Örnek gibi Gagauziyanın serbest güreşmesi sportçusu, angısı koydu kendi önündä maasuz neeti da gitti ona adım — adım, ki etişmää üüsek çıkışlara sport uurunda. Horvatiyada Zagreb kasabasında Dmitriy Malenkov gösterdi, ani veterannarın aralarında da var kuvet güreşmää çempion titulu için. Geçirdi dört güreş becerikli sportçularlan Kazahstandan, İtaliyadan. Finalda karşı-karşıya geldi Amerikadan sportçusunnan. Sportçunun laflarına görä güreş kaaviydi, bakmayadan ona, ani o hepsi güreşleri taradı ballara görä 10-0.
«Hergün geçirdim sınışları. Sabaaylen kros kaçtım. Geçtim ii toplantıları. Koyulmuş neetimä gittim. Gittim çok bu ödülä da te kazandım. Saa ol İlya Semönoviç, ani beni tutturdu. Bän istemäzdim, ama o dedi, ani lääzım. Taa bir keret lääzım. Saa ol bu ödül için. Bu onun ödülü»,-ekledi sportçu.
Sportçunun treneri İlya Uzun getirer aklısına, nicä diil çoktan onu karşılardılar bu stelada, nicä tarayıcıyı kendi trenerlan. Şindi o durȇr burada kendi sportçusunnan. Bu hodulluk bütün Gagauziyaya hem Moldovaya deyni.
«İsteerim sölemää, ani Dima geçirdi 4 güreşmäk. Hazırdı, koydu bütün kuvedini. Herbir güreşi taradı sayılan 10 — 0. Ama bu sölämeer bunun için, ani onun konkurentları yufkaydı. Hepsi konkurentlar kaaviydi. Beni sevindirdi o fakt, ani o bitkidä taradı Amerikanın sportçusunu, angısı geçän yıl oldu dünnä çempionu. O taradı onu sayılan 10 — 0. Amerika yaşayanı etiştirmedi gelmää kendisinä, nicä Dima kaldırdı kendi elini. Bän isteerim şükür etmää hepsi insannarı, kim pay aldı Dimanın hazırlanmasında»,- dedi trener.
Nicä urguladı gençlik hem sport bakanıı Väçeslav Dragoy, genç olannar var kimdän alsınnar örnek. Maasuz bölä sportçulardan, çünkü onun da terbiedeni bir aydan sora gidecek Evropa çempionatına. Biz, nicä sport bakannıı, herzaman tutturacez sportçuları hem yardım edecez onnara gitmää bölä yarışmaklara, urguladı Väçeslav Dragoy.
«İi, ki bizim sportçularımız kazansınnar ilk erleri Evropa hem dünnä çempionatlarında. Biz bütün candan kutlȇȇrız Dmitriyi hem İlya Semönoviçi. Bir taraftan bakarkan, onnar çok yaptılar, ki bu ödülü kabletmää. Bän duyȇrım onnarı, çünkü kendim dä trenerim. Adȇrım onnara becermek hem eni taramakları»,- nışannadı Väçeslav Dragoy.
Çempionun hısımnarı, dostları hem genç sportçular nışannadılar, ani siirettilär, nicä Dmitriy güreşti. Onnar hodullanȇrlar, ani Gagauziyada var taa bir dünnä çempionu.
«Bän hodullanȇrım kendi batümlan, çünkü o oldu dünnä çempionu. Biz onunnan birerdä hazırlandık. O çok kuvet koydu, ki bu adıma etişmää».
«İnsan, angısı koyȇr kendi önündä neetleri da onnara etişer adım — adım, onun önündä bir dä köstek kalmȇȇr. O gider kendi neetlerinä dä biz göreriz, ani o oldu çempion. Hepsi koyulmuş davaaları yaptı».
«Lääzım ondan alma örnek, lääzım sıkı hazırlanmaa herbir sınışlarda, gelmää onnara, seslemää trenerleri, neçin ki onnar bilerlär, ne sana lääzım. O yardım eder sana gitmää ileri».
Mihail Vlah nışannadı, ani Dmitriy Malenkov gösterdi, ani hergün geçirärkän sınışları, var nicä etişmää türlü çıkışlara.
«Bitki yılların süresindä Dmitriy oldu Bulgariyanın çempionu, Ukrainanın çempionu, diil bir keret Moldovanın çempionu. Ama nicä söledi Dima, çok yıl o gitti maasuz bu neetä, ki olmaa dünnä çempionu»,- çizgiledi Mihail Vlah.
Kutladılar Malenkov Dmitriyi onun taramasınnan çalgıcılar da , angıları geldilär onu karşılamaa.
«Pek mutluyum pay almaa bölä büük olayda. Gagauziyaya deyni bu pek büük hodulluk — kazanmaa dünnä çempionatından ödülü, altın ödülü. Çok saa ol hepsinä, kim yardım etti ona hazırlanmaa»,- söledi çalgıcı.
Nicä urguladı Dmitriy, bu ödül sıradakı adım onun karyerasında. İleri dooru o hazırlanacek Moldova çempionatına hem taa bir keret gelän yıla isteer pay almaa dünä çempionatında.