Komrat kasabasının yaşayannarı ambroziyanın beterinä zeet çekerlär. Taa ilerdän bu sokaan bir yaşayanı danıştı GRT kompaniyasına hem komunal izmetinä, aalaşayarak ani alergiyayi verän ambroziya büüyer onun hem komuşların evlerin dolayında. Primariyanın tertiplemäk bölümün çalışannarı çıktılar orayı da bu otları biçtilär. Zanaatçılar sölerlär, ani ambroziyaylan baalı problema taa çok yaz zamanında raatsız eder hepsini, neöin ki o taa sık büüyer boş hem çorbacısız kalan evlerdä.
Komrat primariyanın tertiplemäk bölümün uzmanı Georgiy Kasım urguladı, ani bu yılın sade bir kişi danıştı primariyaya problemaylan, ani onun evin yanında ambroziya büüyer. O urguladı, ani erindeki kuvetlär hazır yardımcı olsunnar, otun yok etmesindä, ama bunun için insan lääzım gelsin primariyaya da kiyat yazsın zerä bunsuz yok nicä insannarın auliçinä girmää.
Polevaya sokaan yaşayanı Vasilisa Kolodka zeet çeker ambroziyadan, neçin ki bu ottan onda alergiya peydalaner. Karı söledi, ani onun danışmasına görä komunal izmeti biçti bu otları onun hem komuşların evin dolayından.
Komrat primarın yardımcısı Viktor Baldji haberledi, ne lääzım yapmaa eerliciim komuşlar kendi evlerin dolayını tertiplämeerlär ne getirer bu gibi zararlı otların büümesinä. O nışanandı, ani lääzım yazmaa primariyaya, neydän sora protokol yapılacek hem da lääzımnı ölçülär kabledileceklär.
Komunal izmetin başı İvan Karaman haberledi, ani işlär ambroziya otun biçmesindä Polevaya sokaanda ilerleneceklär ama insanın aulların içinä onnar yok nicä girsinnär yoksaydı danışmaklar primariyaya.
Ambroziya- zarar hem alergiyayi verän ot. Moldovada erli kuvetleri savaşerlar onu yok etmää. Bunun için danışerlar insana vakıtçasına esaba alsınnar bu ekologiya problemasını da haber versinnär erindeki kuvetlerä bu soruşu çözmää deyni.