Kazayak küüyün liţeyindä geçti kultura uurunda «Ana dilin gözellii halk yaratmalarında» olayı. Baalıydı o gagauz dilin ilelremesinä hem zenginnenmesinä.
Yortulu olay topladı barabar üürenicileri, üüredicileri hen musaafirleri — Kultura uurunda buluşmanın baş nietiydi — korumaa hem ilerletmää gagauz dilini halk yaratmaların yardımınnan.
Pay alannar hazırlamıştılar siirleri, türküleri, bilmeyceleri, söleyişleri gagauz dilindä hem şen halk oyunnarını. Bundan kaarä gösterdilär evelki gagauz karıların giimneri dä. Herbir nomer ayırı nominaţiya oldu, açıklayıp gagauz halkın kultura zenginniini hem özelliini. Bütün Programa geçti gagauz dilindä. Musaafir olarak olayda Kazayak küüyün entografiya muzeyin uzmanı Raisa Kol söledi nekadar önemni halk yaratmaları gagauz dilin korunmasında.
«Benim bakışıma görä, yortu geçti pek gözäl, pek şıralı, meraklı. Uşaklarımız gözäl oynadılar, gözäl çaldılar türküleri ana dilindä — gösterdilär bizim adetlerimizi. Saerım, ani kultura çok önemni bizim ana dilin korunması için, deyni türkülärlän, söleyişlärlän, maanılärlän, masallarlan bizim göstereriz şıralı gözäl ana dilimizi, lafedäbileriz onda»,- Raisa Kol söledi.
Olayın kurucuları nışannadılar — bölä olaylar yardım ederlär dili korumaa, hep ölä da evlad boylarına göstermää, geçirmää halk adetlerini hem ruh zenginniklerini.Kazayk teoretik liţeyin muzikada üüredicisi Mariya Taka çizgiledi ana dilin önemniini gagauz halkın yaşamasında.
«Biz bu yortuda büün açtık herbir taraftan herbir uuru, neçin deyni bizim ana dilimiz kullanılȇr bän saerım, ani folklorlan, muzikaylan, türkülärlän, söleişlärlän. Bu uurda biz taa zengin kullanȇrız kendi ana dilimizi, ama en paalı, ani biz onda lääzım kendilerimiz lafedelim, neçin ki lafetmedään evdä gagauz dilindä, ana dilindä -zor olȇr uşaklara, ama açan onnarı üüredersin gagauz türküsünü çalsın yada söleişleri sorȇrsın — oonar geeri vererlär cuvap — ozaman o uşakk başlȇȇr taa var nicä demää- taa sık lafetmää kendi ana dilindä»,- Mariya Taka çizgiledi.
Olayın sonunda herbir pay alana üüsek göstermeleri için gramotalar verildilär.
Moldovanın hem Gagauziyanın en mekalı haberleri GRTnın Telegram kanalında!