Komrat kasabası incäzanaat okulunda ödülledilär dolay resim yarışmasının pay alannarını , angısını “Ana dili” yortusuna adadılar. Akţiya Komrat dolayı administraţiyasınınnan geçirildi.
İncäzanaat yarışmasını geçirmäk teklifininnän Komarat dolay administraţiyası çıktı, ona dolayın genç resimcileri katıldılar. Resim yarışmasını “Ana dili” yortusuna adadılar, nışannadı Komrat dolayı administraţiya başı yardımcısı Nikolay Statov: «Komrat dolayı admi̇ni̇straţi̇yası her yıl bölä olayları geçirer, ki bizim uşaklarımız göstersinnär kendilerini, ki biz görelim, ani bizdä çok talant var. Büün biz resim yarışmasının çıkışlarını yapȇrız, onnar gagauz halkının adetlerinä, kulturasına hem dilinä adandılar. Yarışmaya 139 resim katıldılar, jüri azaları en iilerini ayırdı».
Uşaklar resimni yaratmalarda sevgi dilä, kulturaya, adetlerä kırmızı çiziylän geçer. Boyaların yardımınnan uşaklar bu sevgiyä bakışını açıkladılar, nışannadı yarışmak komisiyası başı, D.Savastin adına resim okulu öndercisi Sergey Savastin: «Bu yarışmakta bi̇z en talantlı uşakları belli̇ etmää savaştık. Pek sevineriz, ani yarışmayı her yıl geçiriler. Yıl-yıldan katılannarın sayısı zeedelener. Bu söleer onun için, ani uşaklarımızda patriotluk duyguları var hem onnar zeedelenerlär. Pek sevineriz, ani dolay administraţiyası geçirer bölä yarışmakları».
Yarışmanın kurucuları nışannadılar, ani bölä akţiyalar vererlär kolaylık uşaklarımıza gagauz adetlerinä saygıyı terbi etmää. Onda pay aldılar nicä resim okulların hem incäzanaat evlerin üürenicileri, ölä dä resimnemää sevennär. Dmitriy Kostov küçüklüündän sevärdi siiretmää babusunun pala dokuması izmetini, kendi aklına getirmeklerini o resimdä annattı.
«Bu yarışmakta bän seftä pay alȇrım. Beni bu tema pek dalgalandırdı, çünkü o bana pek yakın küçüklüümdän. Benim babum pala dokuyardı düzendä, onuştan bän kararladım kendi duygularımı resimdä göstermää»,- Dmitriy Kostov nışannadı.
Bölä olaylar uşaklarda incäzanaat duygularını ilerlederlär hem halkımızın kultura varlıını sevmää terbiederlär. Yarışmak taa bir sıra gösterdi hem çizgiledi geçmişin, şindiki zamanın hem gelecään sıkı baalantısını.
Moldovanın hem Gagauziyanın en mekalı haberleri GRTnın Telegram kanalında!