Kasım ayın 11-dä, Çadır kasabasında geçti anmak akţiyası, angısı adalıydı Birinci dünnä savaşın 106-cı yıldönümünä.
Çadır muniţipiyasının «Pobeda» parkında, anmak taşların yanında, geçti anmak akţiyası, angısı adalıydı 1914-1918-yılların Birinci dünnä çengin askercilerinä . O çenk aldı binnärnän can, büünnän-büün, gider o çenktä kurbannarın aaraması. Onnarın arasında Çadır muniţipiyanın 75 yaşayanı, angıları öldülär yada kaybeldilär o çenktä. Birinci dünnä cengin pay alannarını yaşlarnan getirerlär aklına, çizgileyeräk, ani o istoriya sayfaları dill lääzım unudulsun.
«Dädum yaralı geldi cenktän, açan geçirärdilär askerä, bütün sokak aalardı, pek çok insan ozaman aldılar askerä».
«Bu bizim istoriyanın sayfaları. İstoriya- o nicä bir kiyat, angısının sayfalarını lääzım çevirmää, onnarı dill lääzım koparmaa, ki olsun kolaylık dönmää geeri da görmää, ne var nicä yapmaa hem dill lääzım. Lääzım hepsini yapalım, ki bölä çirkin işlär başka olmasın».
İstorik İgnat Kazmalı anmak akţiyasının süresindä danıştı gençlerä saysınnar hem unutmasınnar istoriya sayfalarını.
«Görerim burada gençleri, isteerim sizdä olsun uzun, gözäl yaşamak, cenksiz. En büük kahramanlık bu yaşamakta o, açan insan dooru hem faydalı kendi yaşamasını götürer»,- istorik İgnat Kazmalı söledi.
Svetlana Kapanji 2014-2017 yıllarda geçirdi aaraştırmakları da buldu, ani Birinci dünnä çengindä kaldırıldı oniki bindän zeedä Bessarabiya gagauzları, bindän zeedä onnardan geçindi.
«Biz isteeriz, лi unudulmasın bizim istotiyanın sayfaları. Onuştan biz toplanȇrız, getireriz aklımıza, gagauzlar en çok yaralandı bu cenktä, pek çok geçindi, bindän zeedä. Biz lääzım tutalım onnarı aklımızda da annadalım o sayfalar için evlat boylarına»,- Svetlana Kapanji söledi.
Büünkü gündä nışannandı onuncu yıldönümü, nicä Çadır kasabasında açıldı anmak taşı Birinci Dünnä çengin pay alannarına.
«Çadır kasabasının primariyasına erli nasaatından büük saa ol Kapanjı Svetlana Nikolaevnaya, ani on yıl geeri o çıktı iniţiativaylan bu anmak taşını yapmaa insannara, kim geçindi Birinci dünnä cengindä»,- Valentin Kara, Çadır kasabasının primarın yardımcısı, söledi.
Anmak akţiyanın süresindä geçirildi moleben hem olayın pay alannarı koydular çiçekleri anmak taşlarına. Olay geçiriler Çadır muniţipiyasında 2014 yıldan.