Komratta trener Nikolay Trubaçkov anması için futbol turniri geçirildi. Yarışmak birleştirdi en küçük futbolcuları «Taur» Kaguldan, Komrat futbol klubundan , Çadır-Lunga ikinci sport şkolasından hem Vulkaneş kasabasından.
Trener Nikolay Trubaçov Ukrainadan Gagauziyaya gelip, «Taur» hem «Olimp» FK-da terbietmää uşakları hem professional futbolcuları başladı. Bu kısa iş zamanın süresindä onu sevdilär diil sade uşaklar ama barabar onunnan çalışan trenerlär, angıları sıcak laflarlan anȇrlar bu adamı. «Taur» klubunun prezidenti Nikolay Sarioglo söledi, ani türlü olaylar yardım eder uşaklara unutmamaa onnarı, kim üüretti diil sade futbol oynamaa, ama da yaşamaya.
Nikolay Sarioglo, «Taur» FK prezidenti, söledi: «Bizim klub çalışarkan , onun adı da yaşayacek. Biz bu turnirleri Nikolay Trubaçovun anmasına da yapacez. Bu kasabada onu çok kişi biler, ii adamdı. Para kazanmak için işlämedi, her zaman istedi yardım etmää – boşta gezän köpeklerä, kliseya. Çok ii ürekli, açık insandı. Ne istesän – her zaman yanındaydı».
Küçük futbolcular gösterdilär diil sadece tehnika hem dayanıklılık, ama da komanda ruhunu. Sportçular açıkladılar, ani oyunnar zordu, karşı taraf güçlüydü. Bir payına deyni futbol – bu sadece hobi diil, ama büük sporta yol.
«Bän ii oynȇȇrım futbola hem evdä trenirovka yapȇrım».
«Biz 5:2 taradık da puan kazandık».
«Biz “Taur”lan oynadık, ii yaraştık».
«Oyun iidi, bana hoş geldi, bir gol urdum».
«Tarattık, çünkü onnar taa güçlüydü».
Çadır-Lunga hem Valkaneş komandalarının trenerleri sayȇr ki, bu türlü turnirlar çok önemli, çünkü onnar yardım eder uşakları terbi etmää hem unutmamaa te onnarı, kim üüretti futbol oynamaa.
Sergey Ponomarenko, trener söledi: «Bu yaşta herbir matç – bu deneyim. Trenirovka ayırı, ama oyunda uşaklar stres geçirer, bu onnara yardım eder taa kaavi olmaa. Sora matç onnara deyni trenirovka gibi olur».
Efim Kovbasa, trener, söledi: «Baştan sona kadar oyun çok girgindi. Bizim uşaklar çalıştı, ama bu gün olmadı. Bu deneyim – biz burayı geldik duygular hem yarışmak için».
Taur futbol klubun treneri Andrey Arjıntar urguladı, ki bu türlü oyunnar sportçulara deneyim verer hem istemäk taa ii çalışmaya.
Andrey Arjintar, «Taur» FK treneri, söledi: «Bu insan çok iş diiştirdi futbolda. Her zaman iiydi, kültürlü, yardımçıydı. Biz uşaklara annatmaa çalışȇrız, ki onun anması onnarın üreklerindä yaşasın. Onnar büük havezlän gelerlär oynamaa hem kef alȇrlar».
Bu turnirdä kazanan yoktu – hepsi uşaklar ödülleri aldılar, komandalar – kubokları. Turnir taa bir keret gösterdi sportun önemniini insannar için, angıları baaladılar yaşamalarını futbollan. Bu turnir geçecek her yıl, urguladılar hazırlayıcılar.
Moldovanın hem Gagauziyanın en mekalı haberleri GRTnın Telegram kanalında!