İyün ayın 3-çündä pravoslav insannarı kutlȇȇrlar imperatorun Konstantinın hem onun anasının Elenanın gününü. Bu gün kliselerdä yortulu slujbalar geçtilär.
Konstantin hem Elenanın günündä inancılar aklına getirerlär ayozluların yaptıklarını, onnarın zaametlerini ki hristian inanı ilerlesin hem da din kaavilensin. Ayozlu Konstantin hem Elena sayılȇrlar çok kliselerin, hramnarın hem kasabaların koruyucularınnan. Onnarın yaşaması var nasıl örnek olsun nicä dooru hem fikirli devleti kullanmaa, angısı hristian paalılıkları koruyȇr, nışannadı İoan Predteçe adına klisä izmetçisi Dmitriy Tanasoglo: «Onnar çok savaştılar, ani bizim ayoz dinimiz, ortodoks dinimiz bu dünneya geldi, kaavileşti. Da onnarın hatırınnan hem gözäl işlerinnän biz büünnän- büün savaşȇrız, koruyȇrız, ne kaldı bizä ayoz bobalardan, neçin deyni onnar savaştılar Hristozun laflarını herbir insana getrisin onu ne lääzım bizim cannarımıza. O kurtarılmak».
İyün ayın 3-dä insannarın çoyu kendi ayoz gününü bakȇrlar. Da bu gün onnar kutlamakları kablederlär.
«Konstantin hem Elena büün. Bu büük yortu. Elena buldu kruçayı, angısında geeriliydi İisus Hristos da te ondan çeketti pravoslavie. Büük yortu da biz onu sayȇrız,gözäl yortumuz. Pek çok insanın var adları Konstantin hem Elena. İnsan geldi, kurban yazdı ayoz günü için. Bunun için biz hepsimiz bu günü lääzım sayalım. Ondan pravoslavie çeketti. Kutlȇȇrım hepsi insanı bu büük yortuylan. Hepsinä saalık, kuvet, Allaa yardımcı olsun hem bütün dünnedä raatlık olsun. Hepsimizä saalık hem annaşmak».
«Büün büük yortu. Geldik, yazdık saalık için. İnsana isteerim sölemää saalık hem mir olsun».
Konstantin hem Elenanın ayoz günü ayırı bir eri hristiannarın yaşamasında kaplȇȇr. İmperator Konstantin önemni rolü oynȇȇr hristiannık kaaviletmesindä nicä Rim imperiyanın devlet religiyasında. Ama onun anası Ayozlu Elena anıldı kendi ayozlu yaşamasınnan.
Moldovanın hem Gagauziyanın en mekalı haberleri GRTnın Telegram kanalında!