Gagauziya Bakannık komitetin sıradakı oturuşunda bakıldı soruş, angısı baalı 2026-cı yılda gerçeklenmeyä plannanmış proektlerin Gagauziya bücetindän verilän kontribuţiyalarınınnan.
Gagauziyanın yaşamak punktlarında 2026-cı yılda gerçeklenmeyä plannanmış cümnä proektlerin arasında bulunȇr iki proekt , angıları geçän yıldan kaldılar, nışannadı Gagauziya infrastruktura bakanı işini götürän Sergey Bolgar: «Komissiya baktı hepsi danışmakları, onnarın arasında var iki proekt 2025-ci yıldan, angıları başarılmadılar. Birisi Kıpçak küüyün uşak sport okulunda energiya korutmasınınnan baalı. Proektin finanslama sayısı 3 mln. 710 buçuk bin ley, kontribuţiyanın sayısı 989 bin 274 ley. İkincisi-Valkaneş kasabası Kosmonavtov sokaan modernizaţiyası. Proektin finanslama sayısı 20 mln.639 bin ley. Kontribuţiya sayısı 1 mln.146 bin ley».
2025-cı yılın proektleri arasında var öleleri, angıları baalı energiya korutmasınınnan, kultura vaarlıının korumasınınnan hem ilerlemesininnän, Gagauziyanın cümnä ekonomikası ilerlemesininnän.
«Çadır-Lunga kasabasında primȇriyanın energiya korutması proekti. Onun finansa sayısı 4 mln. 798 bin ley. Kontribuţiya sayısı 846 ley 812 ban. Ȇtuliya küüyü kultura evin düzülmesi -grant sayısı 4 mln.691 bin ley. Kontribuţiya sayısı 707 bin ley. Beşgöz küüyü kultura evin küçük salonunda pençereleri diiyştirmäk proekti. Grant sayısı 51 bin ley, Kontribuţiya sayısı 25 bin 948 ley»,- nışannadı Gagauziya infrastruktura bakanı işini götürän Sergey Bolgar.
Bakılmış proektlerin arasında bulunȇrlar Çadır-Lunga kasabası yaamur suyunnan hem kasabayı eşilletmäklän baalı proekt, Kırbaalı küüyündä kultura vaarlıını korutmak hem ilerletmäk proekti, Kıpçak küüyü ekonomika ilerlemesi proekti. Hepsi proektlerin genel sayısı 46 mln. leydän zeedä, kontribuţiyalar sayısı 9 mln. leydän zeedä. Bundan sora dokument GHT bakılmaya hem kabledilmeyä yollandırılacek.
Moldovanın hem Gagauziyanın en mekalı haberleri GRTnın Telegram kanalında!