Aprelin 9-da Bakannık komitetin oturuşu geçti, angısında bakıldılar soruşlar, angıları baalı regionun ilerlemesinnän — çiftçilik, bilim uurunda, alış- verişçilerä yardım.
Bakannın komitetin azaları baktılar soruşu GHT seçimnerin finanslaması için. Başkan İşleri Bakanı Ivan Kolioglo nışannadı, ani Bakannık komiteti aldı esaba bu soruşu, avtonomiyanın seçim organın danışmasından sora.
«Bakannık Komiteti karar verdi, ki almaa esaba GHT seçimnerin geçirilmesini hem hazırlamasını, kararlandı ani onnar kirez ayın 21- dä geçeceklär, bu neetlerä 4 million 873 bin ley belli edildi. Finans sızıntısı bakılȇr Gagauziya 2026 yılına büdjet kononunda»,- Ivan Kolioglo nışannadı.
Devlet kanţeläriyası ofisi Komratta GHT kararı için dava kurumunu danıştı. Üg Apelpalatası durguttu GHT -nan kabledilmiş kararların bir payını , angıları baalı seçimnerin hazırlanmasınnan hem geçirilmesinnän. Hep ölä günün planında bakıldı soruş, nicä hazırlandılar çiftçilär ilkyaz ekmäk sezonuna. Hep ölä sölenildi ani dolayların başları lääzım gözletsinnär, nicä gider işlär, urguladı Agrar bakannıı başı yardımcısı işini yapan Svetlana Kuţar: «Maasuz vermää metodik yardımını çiftçi kurumnarına bakmadaan onnarın hak statusuna, plannamaa hepsi soruşları hem bakmaa tehnologiyaları. Kabletmää hepsi ölçüleri işlärkänä toprakları, ekärkänä, hem yardım etmää almaa ekmäk toumnarını İlerletmää işleri, ki işlenilmedik baalarları hem meyva başçalarını köklemää, da kullanmaa bu toprakları ekmektä».
Biznesin ilerlemesi için verili yardımcı finanslar alış-verişçilerin tutturmak fondundan. Bundan kaarä oturuşta kararladılar subsidiyaları İLK EV programmasında. 6 million leydän zeedä vereceklär ki tutturmaa genç ayleleri Gagauziyada, doorudulu ikinci hem üçüncü tranşlar. Bu finans yardımını kabledecek 103 aylä, angıları pay alȇrlar tutturmak programmada kendi evini alarkan.
Moldovanın hem Gagauziyanın en mekalı haberleri GRTnın Telegram kanalında!