Komrat kultura evindä geçti festival, angısı topladı bir zalada Moldovanın çoyu yaşamak erlerindän 30 ansambl. Olayı geçirdi kultura ministerlii hem Komrat kasabası kuvetleri. Konkursun çıkışlarına görä en ii dört kollektiv gösterecek kendi talantını Kişinövun baş sţenasında yortuda, angısı baalı ana dilinnän.
«Bän çalȇrım sana, vatanım» festivalı verer kolaylık oyun kollektivlerinä göstermää kendi ustalıını, urguladı festivalın hazırlayıcısı Elena Maryan: «Bu festivalin neeti, ilerletmää Moldova devletin kultura hem adet zenginniklerini , cuvaplıı kendi devletin önündä, topraan önündä.Bän pek sevinerim, ani Komratta var çok kollektiv , angıları şindi pay alȇrlar pek üüsek uurda. Hem kaavi hazırlı».
Juri azaları nışannadılar, ani festival- bu diil sade konkurs, ama sevgi kendi ana dilinä, halkına.
«Komrat- bu Bucak zonası. Biz getireriz kollektivleri , solistleri, ii, gözäl, meraklı konţerdä, angısı adalı bizim dilin yortusuna».
«Bän sevinerim, ani bu olay geçer bütün devlettä, diil sade Kişinövda. Bir- iki günün içindä biz kasabadan kasabaya da ayırȇrız en ii sesleri, kolektivleri, horları hem solistleri».
Festivalin pay alannarı nışannadılar kolektivlerin üüsek hazırlıını, angıları toplandılar yortuya. Onnar urguladılar ani kayıl eklenmää yortunun atmosferasına başka oyuncularlan.
«Benim bakışıma görä bu folklor festivali pek faydalı devletä, halka deyni, ki göstermää patriotik türküleri , da biz bütün havezlän pay alȇrız bu olayda, ki göstermää, ani bizim halkımız yaşȇȇr, bakılȇr adetlerimiz».
«Biz büün teklif edildik patriotik türkü festivalinä. Geldik Leovo dolayından. Pek sevineriz, ani kablettik teklifi, da büük havezlän pay aldık bu olayda».
Bölä festivallär geçerlär her yıl devletin türlü dolaylarında, bölä uurda olay Komratta geçti ilk keret.
Moldovanın hem Gagauziyanın en mekalı haberleri GRTnın Telegram kanalında!