Komratta geçti haberlemäk sesiyası, angısı adalıydı kolaylıksız insannarın inklüziyasınnan baalı soruşlarına hem gençlerin katılmasına Moldova devletin cümnä yaşamasına. Olayda pay aldılar cümnä organizaţiyaların temsilcileri, angılar işleerlär kolaylıksız insannarlan hem Migraţiyada dünnä kurumun delegatları, erli kuvetlär.
Gençlerin katılması Gagauziyanın cümnä yaşamasına studentlär için koşulların taa ii yapılması, migraţiya hem iş bulmasında iniţiativaların tutturması. Bu hem başka temalar bakıldılar buluşmakta Migraţiya dünnäarası kuruluşun başınnan Moldovada Ȇster Ruiz de Azua KDU rektorunnan Zahariya Sergeylän. Buluşmanın süresindä bakıldılar inklüziya, migraţiya hem barabar çalışmak üüretim sferasında soruşlar.
Bundan sora buluşmak ilerlendi konferenţ zalasında KDU studentlerinnän. Soruşların birisinnän oldu nekadar yakışıklı Gagauziyanın üüretim kurumnarı -universitetlär, koleclar hem şkolaslar kolaylıksız insannar için. Birleşik Milletleri Birlii rezident koordinatoru Moldovada Yeşim Oruç belli etti, nekadar önemni inklüziv iniţiativalar.
Bu ayırı bir moment, neçinki var birtürlü kultura kökleri, ne yapȇr barabar çalışmayı taa önemni, urguladı Yeşim Oruç: «Bu ayırı bir sebep hodulluk için, neçinki bu ilk olay, angısını geçirer Birleşik Milletleri Birlii Moldovada. Da olay maasuz bu temaya görä geçer- kolaylıksız insannarın inklüziyası, integraţiyası. Hepsi olaylar geçerlär lozunglan – hepsini barabar kolaylıksız insannarlan yapȇrız hem onnar için».
Olayın süresindä açıklandılar başarılı örneklär, açan erli kuvetlär barabar işleerlär dünäarası partnörlarlan. Komrat kasaba primar yardımcısı Viktor Baldji annattı başarılmış proekt için 9-cu uşak başçasında, angısı yapıldı Migraţiya dünnäarası kuruluşun yardımınnan.
«Açan biz danıştık bizim partnörlarımıza, onnar kayıl oldular. Proektin paası bir million leydän zeedä kurdu da primariya kendisi bu paraları verämeceydi hem proekti yapamaceydı»,- Viktor Baldji annattı.
«Мотивация» asoţiaţiyası uzmanı Viktoriya Boţan nışannadı, ani kuruluş şansora 23 yıl inklüziya uurunda işleer, da onun özellii onda, ani burada işleerlär kolaylıksız insannar da.
«Biz temsil ederiz diil sade kaliteli izmetleri, ama diiştireriz yaşamayı taa ii tarafına. Bizim kuruluşumuzda var kolaylıksız insannar. Biz içäändan bileriz, nicä bölä insannarın yaşamasını taa ii yapmaa, nesoy onnarda problemalar»,- Viktoriya Boţan nışannadı.
İnsan haklar koruması merkezi üristi Georgiy Bosıy urguladı, nekadar önemni vatandaş cümnesi aktiv olsun da kolaylıksız insannar haklarını kullanabilsinnär.
«Lääzım taa çok yapmaa, ki bu haklar olsunnar diil sade kiyatta, ama insanın yaşamasında da- tükennardä, başka kurumnarda, hererdä. Bunun için cümnä aktiv lääzım olsun»,- İnsan haklar koruması merkezi üristi urguladı.
Bu buluşmak studentlärlän oldu bir önemni adım inklüziya hem integraţiya prinţiplerin ilerlemesindä, ama onun çıkışları yardım edeceklär eni barabar proektleri yapmaa, angıları doorulu olaceklar kolaylıksız insananrın hem gençlerin yaşamasını taa ii yapmasında Moldovada.
Moldovanın hem Gagauziyanın en mekalı haberleri GRTnın Telegram kanalında!