Büük ayın 15-ndä Pandjer operaţiyasının süresindä Afgan cengin veteranı Mihail Tatanosoglo geçindi. Ona verdilär kahramanlıı için orden. Başküü (Kirsovo) kultura evindä Mihail Tanasogloyu andılar insannar, kim onu bilärdi, hem te onnar, kim sayȇr, ani bölä kahramannar herzaman lääzım yaşasınnar insannarın akıllarında.
Afgan cengin veteranı Mihail Tanasoglo duudu Küçük (fevral) ayın 28 – ndä 1959 yılda Kirsovo küüyündä. Başardı orta okulu, sora Sızran üüsek asker uçilişesini. Afganistanda asker etti Mİ-24 uçan komandirı olarak.
«Yazık, ani o erken geçindi. Pek islää bir kişiydi. Boşa sölämerlär, ani Allah en ii insannarı alȇr. Biz orada 18 yaşında çoçuklardık, en paalı ne vardı, orada braktık. Ȇkranda bölä laflar yazılı: «Afganistan benim canımda acȇr»», — nışannadş Moldova Afgan cengin veteran toplantısının başı Mihail Mokan.
Mihail Tanasoglonun yaşaması için onun dostu hem okul ortaa Konstantin Çolak annattı.
«20 yılın süresindä kiminnän dä lafettim, hepsi söledi, ani o pek islää bir kişiydi. Ama uçak bölümün komandirin lafları aklımda kaldı: «Mişa talantlı pilottu. Gagauziya onu kaybetti, ama ecelä karşı gitmeyecän»», — söledi Konstantin Çolak.
Mihail Tanasoglonun yaptıkları diveç insannarın aklılarında kalacȇk, çizgiledi Başküüyün primarı Sergey Sapunjı.
«Sade analar, kardaşlar, kızkardaşlar bilerlär, ne o kalmaa yakındakı kişisiz. Ama onnar kendi borcunu Vatana bütündän verdilär», — söledi Sergey Sapunjı.
Konţerttä çalındı türkülär hem annadıldı şiirlär, angıları adalıydı te o kahramannara, kim kendi yaşamasını braktı cenkttä. Olay başarıldı «Batä & Ȇho Afgana» grupasının türkülerinnän.