Gagauziyada birinci grupa boodayların toplamak kampaniyasının çıkışlarını yaptılar. Bu olayın geçirilmesi için Beşalma küüyün Kültura Evi oldu. Burada toplandılar te onnar kim kendi hergünkü işinnän ilerlederlär çiftçilik bölümünü regionda- mehanizatorları, agronomları, kombaynörları hem kurumnarın başlarını.
Bu yılkı toplamak kampaniyasının baş neeti — bereketi kayıpsız toplamaa — yapıldı. Zor klimat koşullarına bakmayarak, avtonomiyanın agrarilari üüsek bereket topladılar bu yıl. Sţenadan çiftçileri Gagauziya Bakannık komitetin başın yardımcısı İlya Uzun kutladı. O açıkladı ki, bu yıl toplanan her ton boday — bu onnarın girgin işi, saburları hem ana topraana hatır gütmeleri.
Herbir üüsek verimin arkasında dooru esap, agroteknologiyaların erinä getirilmesi hem uzmanların her günkü işleri toprakta. 2026-cı yılın toplamak bereketin kampanyasının çıkışlarını Gagauziya Agrar- bakanı Sergey İbrişim açıkladı. Onun sözlerinä görä, bu yıl birinc grupada olan boodayların üüsek bereketi agrarilerin profesyonallıının, dooru yaklaşımının hem uyumlu çalışmasının sonucudur.
Agrar sektorun ilerlemesi sade insannarın işi diildi, devlet tarafından sistemli desteklenmesinnän da baalıydır. GHT deputatı Valeriy Manastırlının laflarına görä, önemni kurmaa ii koşulları, tehnik bazasını güçlendirmek hem çiftçilerin zaametini esaba almak.
Ama hiç bir sayı hem çıkışlar, çalışan insannarın sözleri çok işleri annatmaz. Onnar için Beşalmada yapılan bu kutlama — iş formasını kısa bir zaman için bir tarafa koymak hem yortu rubalarını giiyip pay almaa bu olayda. Kombaynörlar, agronomnar hem kurumnarın başları söleer: bu sezon bütün gücü, saburluu hem çok kuvet istedi. Ama alınan üüsek bereket oldu baaşış gibi , hergünkü girgin çalışmak için.
«Orak-2026» yortusu gözäl bir adetlän başarıldı: başarılı agrarilerä kolaçları, diplomaları hem baaşışları verdilär. Toplamak kampaniyası tamamlandı, ama agrarielerin dinnenmesi uzun olmayacak. Onnarın önündä — semiçkanın hem papşoy bereketin, üzümün hem meyvaların toplanması, topraan hazırlanması hem kışlık kulturaların ekilmesi. Çünkü soframızdaki ekmek — bir gündä ortaya çıkmayan, hergünkü çalışmanın sonucudur.