Gagauziyada başladılar toplamaa güzlük kulturaların bereketini, hardalı, gorohu hem arpayı. Bizim korrespondent Zinaida Kanţır bulundu Kongaz küüyün kırlarında, neredä kombaynörlar hem traktoristlär toplȇȇrlar gorohu.
Nicä söleerlär insan arasında , yıl bereketlän, açan onu ambara dökecän. Orak ayı taman bu iş için. Kongaz küüyündä İvan Yularjının kurumunda işlerlär 1100 ektar toprak, neredä bu yıl ekili güzlüklär hem ilkyaz kulturaları, semiçka hem papşoy. Bakmadaan yılın hepsi zorluklarına kuraklıı hem ayazlara, toplȇȇrlar diil prost bereket, urguladı kurumun başı İvan Ülarjı. Bereketi toplamak proţesi çeketti vakıtçasına kombaynörlar savaşȇrlar kayıpsız gorohu toplamaa.
«Çekettik bereketi toplamaa, 20 proţentını topladık ilk gruppasında, arpayaı başardık, orta bereket arpada çıktı 43 ţentner. Şindi toplȇȇrız gorohu, o da bizi sevindirer, 35 ţentner kablederiz bir ektardan. Annaşmalara görä, angılarını yaptık insannarlan, hepsini verecez. Ekini topladık, ilkyazdan o pek gözäldi, ama ayazlardan sora dorulmadı»,- urguladı kurumun başı İvan Ülarji.
Toplamakta bir saada geç kalacan-bütün yıl erinä koyamayacan. Onun için kombaynörlar hem traktoristlär nicä söleerlär insan arasında oturmȇȇrlar suukta, tenä başaktaykan. Geç vakıdadan hava verärkänä kolaylıkları toplȇȇrlar gorohu ambarlara. Nicä söleer kombaynör Vasiliy Garçev o çalışȇr kurumda altı yıl, da utgulȇȇr, ani büünkü tehnikada taa komfort çalışmaa hem kayıpsız toplanȇr bereket sıcak havada.
«İİ işleniler, trakturlar eni, tehnika da eni, hepsi alındı işä deyni, eni kırılmȇȇr, kimär keret bozulȇr. Yakın 40-50 ektar gündä toplȇȇrız. Bu yıl bereket taa ii, nekadar geçän yıl. Goroh yakın 3-3,5 ton toplȇȇrız»,- söleer kombaynör Vasiliy Garçev.
Kurumda enilettilär tehnikayı, angısını denedilär kırlarda nicä ekmektä, sürmektä hem bereketin toplamasında. Nicä söleer kombaynör Valeriy Garçev , erlem toplarkana bereketi nesä kırılȇr, savaşȇrlar vakıtçasına erindä düzmää, ki bereketi toplama kayıpsız.
«İleri da eni tehnikaydı, şindi taa kolay işlemää, sıcakta da, kondiţioner var, toplamaa bereketi vakıtçasına çekettik kayıpsız. Şindi düzeriz podşipnii, angısı bozuldu»,- söleer kombaynör Valeriy Garçev.
Yakın 40 yıla kurumda çalışȇr traktorist Georgiy Urum, o getirer aklına , ani 20-30 yıl geeri bereket taa üüsekti, zerä ta çok yaamur yayardı, nekadar bitki yıllar.
«Taa ileri eski tehnikaylan işlärdik, her gün kırılardı, eniylän taa ii işlemää. İkinci afta toplȇȇrız bereketi, yakın üz ektar ekin topladık, şindi gorohu toplȇȇrız, yakın 20 ektar»,- Georgiy Urum söleer.
Bu günnerdä , nicä urguladı kurumun başı, başardıynan ekinin hem gorohun toplamasını, çekedeceklär rapsı toplamaa. O nışannȇȇr, ani bu yakınnarda yaamarsa yaamur nem papşoy hem semiçka büümnerinä etşmeyecek.
«Biz bu yıl rıska gittik, da ektik papşoy, 100 ektar, bitki üç yılın içindä papşoy bu fazayadan, pek gözäl, nicä da büün. Taa tutunȇr, ama belli ediler, ani etişmeer nemnik»,- dedi agrariy.
Hava koşulların beterinä hem nemniin etişmemezlii getirer ona, ani agrariyalar geçerlär eni işlettirmäk tehnologiyalarına, ekerlär tohumları, angıları yarȇrlar bizim klimata.
«Bizim kendi tehnikamız var, 90 proţenda onu enillettik, problema yok, sade etişmeer yaamur. Tehnologiyayı biraz diiştirdik,sürmeeriz topraa yakın dört yıl»,- ekledi çiftçi.
Regionun agrariyaları umutlanȇrlar, ani bu yakınnarda yaacek yaamurlar, da onnar kabledeceklär ii bereketi diil sade ilk gruppasında, ama papşoyda hem semiçkada.
Moldovanın hem Gagauziyanın en mekalı haberleri GRTnın Telegram kanalında!