Beşalma küüyü girer MD o küüylerin arasına, neredä büünnän-büün var nicä karşı gelmää eski lüzgär dermennerini, angıları asirlärlän dedelerimizä un üüdärmişlär. Başalmanın yaşayannarı bu taraftan kısmetli-bu yaşamak punktunda büünkü günädän iki dermen korundu. onnarın birisini erli kuvetlär düzmää kısa zamanda neetlenerlär.
Beşalma küüyü büük hem önemni bir proektin gerçeklenmesinä hazırlanȇr. Burada neetlenerlär küüydä var olan iki un dermenin birisini düzmää. Bu un üütmäk dermenneri -lüzgär yardımınnan asirlärlän küüyün yaşayannarına izmet ettilär. Asirlärca yaşayannarın vaarlıına hem zoorluuna martur oldular. Büün un dermeni arhitektura obyekti gibi sayılȇrlar, nışannadı primar Valeriy Moş.
Dermenin temeli taştan yapılı, kanatları hem baş mehanizması sa aaçtan. Dermenin ortasında bulunȇrlar kayalar, angıları tenä üüderlär. Bu dermen bir asir geeri kuruldu. Bu olȇr sebep ona, ani büün zor bulmaa insannarı, angıları bilerlär onun konstrukţiyasını hem alınaceklar eniletmää onu, nışannadı primar.
Bu dermendä yıllar-boyunca yaşayannar ekin hem papşoy üütmüşlär, un yapmışlar. Onu, amma sade lüzgerli havada kullanmaa varmış nicä, çünkü dermenin kanatları lüzgerä karşı dönüp, kayaları işledärmişlär. Büün bütün bu mehanizmayı lääzım eniledip işletmää enidän, nışannadı Valeriy Moş.
Plannarda var dermenin dolayını da düzmää. Burada koyulaceklar skemneciklär, düzüleceklär gezi patigaları hem dinnenmäk erleri donadılaceklar. Bitki-bitkiya burada turistik eri olsun lääzım , nışannȇȇr primar. hepsi sıralanmış işlär kısa zamanda başlayaceklar. beşalma küüyü un yapmak dermenin düzülmesi o diil sade infrastruktura obyektin enilenmesi, ama önemni bir adım gagauz halkının material hem kultura vaarlıın korumasında hem erli turizmayı ilerletmektä.
Moldovanın hem Gagauziyanın en mekalı haberleri GRTnın Telegram kanalında!