Beşalma küüyü Dmitriy Kara Çoban adına gagauz istoriya — ȇtnografiya muzeyi çalışȇr 50 yıldan zeedä. Bu yılların süresindä muzeyin uzmannarınnan toplandılar çok eski tertiplär. Nesoy ȇksponatlarlan en pek meraklanȇrlar muzeya gelennär üürendi Polina Barbova.
Beşalma küüyü Dmitriy Kara Çoban adına gagauz istoriya — ȇtnografiya muzeyindä bulunȇr 24 bindän zeedä ȇksponat — baş hem yardımcı fondlardan, haberledi muzeyin direktoru Lüdmila Kara Çoban: «Ȇksponatların bütündän sayısı kurȇr 21 bi 333 ȇksponat, da hepsi onnar baş fondtan, ama var yardımcı fondtan da ȇksonatlar. Eni kanona görä, onnar diil lääzım olsunnar. Ama onnarı da ekleyip burayı, hepsi olaceklar yakın 25 bin ȇksponat».
Beşalma küüyü Dmitriy Kara Çoban adına gagauz istoriya — ȇtnografiya muzeyi sayılȇr ilk muzey Gagauziyada, çizgiledi Lüdmila Kara Çoban: «Açan Dmitriy Nikolayeviç Kara Çoban açtı muzeyi ilk yapıda — bu küüyü nasaatın yapısıydı, geçmiş zamanın primariyanın yapısıydı Rumın vakıdında, o zaman o topladı 2 bin ȇksponattan zeedä, açan yapıldı bu yapı. Yakın 1972 — ci yılda Dmitriy Kara Çoban girdi bu yapıya, da çeketti onu tertiplemää. Açan 1975 — ci yılda açıldı ikinci ȇkspoziţiya, ozaman onda vardı 4 bindän zeedä ȇksponat, o vakıtlar».
Dmitriy Kara Çobandan sora muzeyin başı oldu Mina Kösä. Onda ȇksponatların kollekţiyası zeedelendi, da kurdu 5 bindä zeedä. Sora muzeyin öndercisi oldu Afanasiy Kara Çoban, nışannadı zamandaş muzeyin başı Lüdmila Kara Çoban: «Bän açan geldim vardı 6. 5 bin ȇksponat. Bu diil çok. Komrat kasabasının istoriya — dolay muzeyindä onnar taa çok. Onnarın fondu, elbetki, başka. Onnarda başka durumdu. Biz kendimiz toplȇȇrız. Büünkü günnär M.Maruneviç adına Bilim — Araştırmak merkezi hem Gagauziyanın kultura bakannıı, onnar bizä vererlär eni tiparlanmış kiyatları , ama hepsi başka işleri biz kendimiz bakȇrız».
Muzeyin musaafirlerini meraklandırȇr türlü ȇksponatlar, ama en pek angıları baalı gagauz halkın dilinnän hem da kulturasınnan, çizgiledi Lüdmila Kara Çoban: «Hepsini onnarı meraklandırȇr, angı dildä biz laffederiz, nicä biz üüreneriz, angı grafikada biz yazȇrız. Yabancı devletlerin üristleri sorȇrlar bizdä nesoysa kanonnarı. Mediţina uzmannarı sorȇrlar nesoysa medik tedarlıkları için, varsaydılar onnar bizdä. İsteerim çizgilemää, ani herbir gruppayı biz durgudȇrız ilk zalda, istoriya zalında, gelip deyni burayı, bulsunnar cuvabı: «Kim onnar — gagauzlar».
700 — dän zeedä tema var nasıl Beşalma küüyü Dmitriy Kara Çoban adına gagauz istoriya — ȇtnografiya muzeyin uzamnnarı açıklasınnar, nışannadı muzeyin başı Lüdmila Kara Çoban: «Benim praktikamda edi saat sıradan geçirdik ȇkskursiya jurnalistlerä «TURKSOY» gazetasından Türkiye devletindän. Hepsi başka ȇkskursiyalar , elbetki, taa az. Hertürlü oldu».
Gagauziyada ofiţial çalışȇr 13 muzey — regional, erli, ȇtnografiya, dolay hem başka.
Moldovanın hem Gagauziyanın en mekalı haberleri GRTnın Telegram kanalında!