Canavar ayın 29-da bakılȇr Besarab bulgarların yortusu. Bu gün Taraklı kasabasının kultura evindä geçti halklararası uşak yaradacılık festival-konkursu. Onda pay aldı avtonomoyanın genç artistleri hem dans kolliktivleri.
Festival oldu halizdän yaradacılık yortusu, neredä hepsi onun pay alannarı, var nicä göstersinnär kendi talantlarını. Festivalin pay alannarı seviner, ani onnarda var kolaylık göstermää kendi halkın zengin mizika folklorunu, da bununnan destek olmaa onun korumasına hem ilerlemesinä.
«Bän çok sevinerim, ani pay aldım bu festivaldä. Sevinerim, ani var nicä gösterim bulgar kulturasını».
«Bän beenerim, ani pay alarak bölä festivallerdä, bän üürenerim eni işlerini, eni kulturaları. Bana deyni bu büük fayda».
«Bäm ilerlederim benim kulturamı, çünkü zanaatlanȇrım muzikaylan. Türkü yardım eder bizä annamaa, ne isteer annatmaa bizä çalgıcı, ne için o yazardı».
«Bän başladım zanaatlanmaa muzikaylan, çünkü bana deyni o pek meraklı. Bän göstererim bulgar kulturasını, lääzım tutmaa aklımızda bizim adetlerimizi, korumaa onnarı. İlk eri almasaydık kötü yok, ama bän umutlanȇrım, ani biz ilk olacez».
Festivalin kurucuları oldular Moldovada bulgarları asoţiaţiyası başı Aleksandr Borimeçkov hem Taraklı dolay başı Lazar Dermenji. Onnar nışannadılar, ani festival birleştirer halkları, angıları yaşȇȇr Moldovanın üülen tarafında.
Lazar Dermenji Taraklı dolay başı: «Elbetki, bu bizä deyni pek önemli, bizim bulgar kulturanın koruması için. Burada var kollektivlär Bulgariyadan, Taraklı dolayından, Gagauziyadan. Bizim kulturamız benzeşer, biz lääzım onu koruyalım bizim genç evlat boylarına».
Aleksandr Borimeçkov Moldovada bulgarları asoţiyaţiyası başı: «Bizä, bulgarlara, pek önemli bir yortu. Biz lääzım o adetleri, o kulturayı, angısını kablettik, bizim evlat boylarımıza koruyalım hem ilerledelim. Her yıl burada, Taraklıda, biz bakȇrız bu yortuyu. Bu yıl, bu yortu günündä biz kurduk halklararası festivali, angısı topladı sţenada diil sade bulgarları, ama gagauzları da».
Festival fayaalıı halk instrumetlerin korumasında, sayȇr Komrat Devlet Universiteti kultura hem yaratmak kafedrası başı Tatyana Şögoleva.
«Bölä festivallerin önemlisi pek büük. Ondan kaare, ani uşaklar var nicä göstersinnär kendi talantlarını, bölä festival yardım eder korumaa halk intrumentlerini, angıları bitki vakıtlar kaybeler. Bu festiväldä onnar vardı çok, onnar lääzım çalınsın herbir küüdä, kasabada, bütün Respublikada»,- Komrat Devlet Universiteti kultura hem yaradıcılık kafedrası başı Tatyana Şögoleva sayȇr.
Taraklı kasabasında Halklararası uşak yaradacılık festivali konkursunda pay aldı 70 uşak Taraklı, Komrat, Tvardiţa kasabalarından hem Bulgariya devletindän. Hepsi er alannara verildi medalilär, gramotalar hem başka baaşışlar.