Komrat kasabası M.K.Atatürk adına bibliotekasında resimcinin Konstantin Keleşın resim sergisi açıldı. Sergiya çıkarıldılar 22 yaratma, taa derindän süjetimiz.
Keleş Konstantinın adını resimci olarak bilerlär diil sade Gagauziyada hem MD, ama çok taa başka devletlerdä dä. Ayırı er onun yaratıcılıında beygirleri resimnemäk kaaplȇȇr. Bu tema diil sade incäzanaatta, ama yaşamak yolun bütün uzunnuunda ayırı eri kaaplȇȇr. Konstantin Vasilyeviç iki yaşından beeri beygirlärlän tanışȇr hem yıllar boyunca onnarlan işledi.
“Bän küçükkenä nunama musaafirlää gidärdim hem o bana resimnemäk için albom hem kalem başlaardı. Ozamandan da bän başladım resimnemää”.
Resimnerdä görünän çotka izlerindä avtorun sevgisi hayvannara duyulȇr. Konstantin Vasilyeviç gösterer beygirin harakterini, anatomiyasını, halını. İşläärkenä çotkaylan avtor savaşȇr annatmaa hem göstermää diil sade beygirin gözelliini, ama halını, içankı dünnesini.
“Benim resimnerin çoyu devletlerdä var. Sau Araviyada görennär resimnerin birisinä pek şaşmışlar”.
Beygirlerin dünnesi Konstantin Vasilyeviça deyni özel erdä bulunȇr. Beygirlär onun bütün yaşamasında vardılar hem kalȇrlar. Onun yaratmalarında sevgi hayvannara hem usta eli birleşip, beygirlerin kuvedini, serbestliini hem gözelliini gösterelär.
“Burada benim küçüklüüm, gençliim, yaşamam. İsteerim herbirinä dilemää, ani geldiynen sergiyä onnarın cannarı yısınsın hem sevinsin”.
Kimäsä beygir-kulturamızın hem istoriyamızın payı, kimäsä- yaşamanın yardımcısı hem dostu. Konstantin Keleşa deyni yaşamanın sevgili zanaatı, angısını o resimnerdä gösterer hem siyredicilärlän paylaşȇr. Tanışmaa yaratmalarlan var nicä Komrat kasabası M.K.Atatürk adına bibliotekasında.