Komrat kolecin studentleri yardımcılık akţıyasını geçirdilär. Paralar gideceklär Komratta bulunan köpeklär için priyuta.
Oyuncakları, blezikleri, kiyatları, ellän yapılı işleri, tatlılıkları hem başka işleri varniceydi satın alsınnar insannar, ki yardım etmää köpeklär için priyuta. Yardımcılık akţiyası topladı studentleri, üüredicileri hem kasabanın yaşayannarını. Nicä söledilär studentlär, onnar pek istärdilär yardım etmää hayvannara, çünkü onnarın yok evi hem yok kim hatır gürsün onnar için.
«Bän sayȇrım, ani bizim lääzım olsun cuvaplıımız hepsi hayvannar için, çünkü onnar bizim dostlarımız. Onnarın lääzım olsun evi».
«Biz hazırladık bu sergiyi, ki yardım etmää boşta gezän köpeklerä, çünkü bizdän kaarä yok kim onnara yardım etsin».
«Boşta gezän hayvannara lääzım yardım etmää, ki onnar gezmesinnär aaç».
«Bana geler, ani bu sergi yardım edecek hayvannara bulmaa kendi evini».
«Hayvannar hem köpeklär bizim dostlarımız, da biz, insannar, onnara lääzım yardım edelim».
Herbirin vardı kolaylıı yardım etmää- alıp tatlılık yada başka işleri, yada koymaa para urnaya. Nicä urguladılar uşaklar, diil büük sayıda da yardımın büük faydası var. Önemni — pay almak hem istemäk yardım etmää.
«Biz kararladık geçirmää bu sergiyi, ki yardım etmää hayvannara, angıları hasta, bizdä büünkü günä bölä hayvan çok var».
«Bu sergi verer şans yapmaa iilik boşta gezän hayvannara, çünkü diil herbir insan götürecek imek priyuta, bölä olaylar sa yardım ederlär toplamaa finans, ki onnar kabletsinnär imää, örtü hem sıcaklık».
«Pek önemni, zerä o bizi birleştirer yardım etmää deyni hayvannara».
Kolecin student nasaatından çıktı serginin ideyası. Nicä nışannadılar üüredicilär, bölä sergilär terbiederlär gençlerdä cuvaplıı hem acızgannıı.
«Bu sergi cümnenin terbietmäk elementlerin birisi, borc duygusu, bir taraftan, acızgannık öbür taraftan, neçinki boşta gezän köpeklerin probleması pek aktual hem önemni bizim kasabada»,- nışannadı üüredici.
Hepsi toplanmış finanslar verileceklär erli priyuta, neredä bakılȇrlar köpeklär. Nicä urguladı volontör Alla Hudoba, bu büük yardım. Bu paraları harcayaceklar almaa deyni imää, ilaçlamaa hem taa komfort yapmaa onnarın koşullarını priyutta.
«Ne yaptılar uşaklar, bu pek ii, açık. Bu örnek ona, nicä iilik, birleştirer insannarı, nicä birleşik neetlär var nicä büük işleri yapsınnar. Yardım te onnara, kim yok nicä sorsun yardım için. İsteerim sölemää çok saol hepsinä, kim hazırladı bu olayı, hepsi üüredicilerä, koordinatora Nataliyaya»,- volontör Alla Hudoba urguladı.
Her gün volontörlär hatır güderlär hayvannara, ama resurs çok kerä etmeer. Bölä olaylar yardım ederlär priyutta götürmää kendi işini.
«Büünkü günä durum priyutta yok nicä sölemää, ani pek kötü, ama zor. Neçinki onda lääzım bulunsun 100 köpek, ama taa çok bulunȇr. Ama ii dinamika. Pek ii, ani volontörlar bulȇrlar hayvannara ev hem çorbacı. Bizim hayvannarı alȇrlar Moldovanın herbir dolayında. Ama problema onda, ani onnarın erinä gelerlär eni hayvannar. Biz annȇȇrız, ani bizim insannarın yok cuvaplıı onnarın önündä»,- Alla Hudoba urguladı.
Hazırlayıcılar umutlanȇrlar, ani bölä sergi olacek ii adet. Studentlär sayȇrlar, ani yardım var nicä türlü olsun , ama en önemni — istemäk diişrtirmää dünneyi ii tarafa.
Moldovanın hem Gagauziyanın en mekalı haberleri GRTnın Telegram kanalında!