Bucak küüyün gimnaziyası hem Ferapontyevkanın Маrko Vovçok adına gimnaziya-uşak başçası reorganizaţiyayı geçecek. Postanovlenie aprelin 29 Bakannık komitetin oturuşunda kabledildi.
2026-cı yılın sentäbrinin 1-dän Bucak küüyün gimnaziyası başlankı okula dönecek. Gimnaziyanın üürenicileri Komradın S.Kuroglo adına gimnaziyasına geçeceklär. Uşakların geçişi Üüretim Ministerliin kararına görä yapılacek. Gagauziyanın üüretim bakannıın haberlerinä görä, Bucaan gimnaziyasında 60 uşak üürener, Ferapontyevkanın gimnaziya-uşak başçasında – 20, söleer Üüretim bakanı Natalya Kristeva: «Bucak küüyün gimnaziyasında büünkü günä 61uşak üürener. Başlankı klaslarda — 32, gimnaziya sınıfında — 29. Normaya görä sä 35 üürenici lääzım olsun. Bunun için reorganizaţiya gimnaziyadan başlankı okula bekleniler».
2026-cı yılın sentäbrinin 1-dän Ferapontyevka küüyün Marko Vovçok gimnaziya-uşak başçası sade uşak başçası kalacek.
«Ferapontyevkada 20 uşak üürener. Başlankı klaslarda — 11, gimnaziya klasında — 9. Üüretim kodeksin 145 statyasına görä, üüretim kurumu sade uşak başçası kalacek».
Ferapontyevkanın üürenicileri Avdarmanın Dm.Çelengir adına liţeyinä geçirilerlär. Üüretim bakanı Natalya Kristeva çizgileer, ani reorganizaţiya kanona görä yapılacek, esaba alınacek bu yaşamak erlerindä demografiya haberleri dä.
«Bucak küüyündä orta sayıya görä, 10 uşak yılda duȇr. Ferapontyevka küüyündä – 3 uşaadan yılda. Butakım duumak sayısına görä, küçük klaslar kurulȇrlar yada hiç açılmȇȇrlar».
Bakannık komiteti başı yardımcısı İlya Uzun söleer, ani dokument GHT yollandırılacek.
«Karar acılı hem kararı biz lääzım kabledelim. Durum halizdän zor»,- İlya Uzun söleer.
Bakannık komitetin azaları teklifi tutturdular. Getirderiz aklılarınıza, ani Moldovanın Üüretim Ministerlii 2025-ci yılın dekabr ayından okulların reforması için bildirdi, angısı devletin hepsi regionnarına ilişecek, Gagauziya da o sayıya girer.
Moldovanın hem Gagauziyanın en mekalı haberleri GRTnın Telegram kanalında!