Çadırda, oktabri ayın 5-dän 6-sına karşı geçä, büük yaamur yaadı hem sert lüzgär esedi. Prost hava kimi sokaklarda evlerä zarar getirdi: örtüleri kopardı, aaçları erä yıktı, kimi yapılara su girdi. Aylelär evlerini tertiplemää savaşȇrlar hem kuvetlerdän yardımı bekleerlär.
Sabaalen, yaamurlu hem lüzgerli havadan sora, Sovhoz mikrorayonun yaşayannarı evlerinin örtülerini kendi kuvetlerinnän düzmää başladılar.
«Bän birinci katta yaşȇȇrım. ikinci katta kimsey yaşamȇȇr. Savaşȇrım düzmää örtüyü, bizä su etişmesin deyni. Primariyadan geldilär. Dedilär, ani yardım olacȇymış»,- Çadır kasabasının yaşayanı Dmitriy çızgiledi.
Şiferleri lüzgär aldı. Su içeri girdi. Busoy kötü havanın sonuçları için Sovhoz mikrorayonun yaşayanı Vasilisa annadȇr. Onun aylesi örtüyü düzdü tez. Çünkü sinoptiklerin haberlerinä görä ertesi gecä taa bir büük yaamur vardı nasıl yaasın.
«İçerlerä su girdi. Nem herersi. Tavannar yaş. Gittik, şifer aldık. Düzdük örtüyü. Primariyaya gitmää neetliyiz. Bekim yardım edecez»,- annattı Vasilisa.
Örtüyü düzmää deyni Vasilisanın aylesi 4000 ley harcadı. Taa lääzım içerleri dä düzmää. Hep busoy durumda Ruseva Mariyanın aylesi.
«Su akȇr içeri. Hererdä teknä koyulu. Kızım primariyaya gitti. Demişlär, ani birkaç şifer vereceklär. Ama ne fayda bundan. Yarım örtüyü lüzgär aldı. Ne kaldı , o şiferlär dä eminim, ani kötü halda bulunȇrlar»,- sayȇr Mariya Ruseva.
Vadim Vatav Komratta yaşȇr. Çadıra geldi anasının kvartirasını dolaşmaa hem lüzgerli yaamurdan sora onun durumunu görmää. Söleer, ani var zarar, hem ani kuvetlerä yardım için danıştı, ama cuvabı taa kabletmedi.
«Görersiniz mi, herbiri kendi örtüsünü düzmää çalışȇr. Ama kolaylıkları varsa. Hepsinin dä kolaylıı yok. Yaşayannarın taa zeedesi pensioner. Deyelim, benim anam — o da pensiyada»,- nışannadı Vadim.
Mira, Budjakskaya, Proezdnaya sokaklarında kimi evlerin örtülerinä zarar oldu. Bütündän kasabada büük lüzgär 350 şifer aldı. Kimi evlerä su girdi. Aaçların dalları kırıldı, kimi aaçları erä yıktı. Bundan kaarä parklara, yollara zarar oldu. Zararın sayısı — yakın 700 bin ley, söledi Çadırın başı Anatoliy Topal.
«Çadırın rezerva fondunda 30 bin ley var. Biz kablettik karar nereyä bu sayıdan 20 bin ley harcanacȇk»,- dedi primar.
Muniţipal nasaatın oturuşunda kötü havanın sonuçları bakıldılar. Çadırın Hatalı olaylar komissiyasının azaları dokumentlerdä olan yazıları açıkladılar. Nasaatçılar kablettilär kararı, ki Gagauz Erin hem Moldovanın kuvetlerinä finans yardımı için danışmaa.
Avtor: V.Çoban, operator: S. Georgiev, montaj: M.Kazaku