Moldovada Çıfıtlar birlii barabar Çıfıt mezarlıkların korunması Evropa iniţiativasınnan, Çadır kuvetlerin hem halklararası partnörların yardımınnan geçirdilär düzmük işlerini, ki çıfıt mezarında tokatları eniletmää.
Kişinöv kasabasından istoriya doktoru hem Çadır muzeyi başı Stefanida Stamova annattılar çıfıt halkın yaşaması için regionda hem o istoriya sayfaları için, ani kaybelmişlär. Bu temaya maasuz lekţiya adalıydı. Ondan sora hepsi pay alannar hem musaafirlär geçtilär çıfıt mezarına. Çadır primarı Anatoliy Topal urguladı, ani pek önemni istoriya sayfalarını korumaa gelän evlad boyları için.
«Insannar, angıları bu birlää girärdilär, çok fayda getirmişlär bizim kasabanın ilerlemesinä. Onnar çalışmışlar türlü bölümnerdä — doktor, üüredici, başka uzmannar, brakıp derin izlerini kasabanın istoriyasında»,- dedi primar.
Bu proektin önemnii için çıfıt halkına deyni hem iki devletin baalantıları için söledi Izrael Büük elçisi Moldovada Yoram Elron: «Büük saygıylan hem cuvaplıklan biz toplandık burada bu proektin aslıya çıkarılmasında. Bu er diil sade çıfıt insannarın gömülmäk eri, ama çok yılkı istoriyayı gösterän er, belli edili burada inan hem kultura».
Moldovada Çıfıt Birlii başı Alexandr Bilinkis nışannadı, ani tokatların düzülmesi — bu diil sade fizik uurunda koruntu, ama gelän evladlara aslıyı açıklayan sayfalar.
«Bu diil sade er, neredä çıfıtlardan kişilär bitki yola geçirildilär, kim çalışmıştı bu regionda, kasabada. Bu mezarlık — o büük bir nışan istoriyada, angısı gösterer ruh kaaviiliini hem inanı»,- Alexandr Bilinkis nışannadı.
Almaniya büük elçiliin adından söz tuttu Magdalena Puarye. O söledi, ani pek önemni halklararası barabar çalışmaklar olsunnar bu uurda.
«Almaniya diplomatı için bu olay pek önemni. O verer bizä kolaylık annamaa, nekadar bizim var istoriya cuvaplıımız çıfıt halkın uurunda, ani biz lääzım onu koruyalım»,- Magdalena Puarye nışannadı.
Bu proekt aslıya çıkarıldı Moldovada Çıfıt Birliinnän, Çıfıt mezarlıkların korunması Evropa iniţiativasınnan birliktä Çadır kuvetlerinnän hem halklararası partnörlarlan.
Moldovanın hem Gagauziyanın en mekalı haberleri GRTnın Telegram kanalında!