Çadır kasabasında «Gagauz türküsü» 26-ci festivali geçirildi. Olayda pay aldılar artistlär hem kollektivlär Gagauziyanın türlü küülerindän hem kasabalarından.
Pay alannar için «GAGAUZ TÜRKÜSÜ» festivali o diil sade kolaylık sţenaya çıkmaa ,ama korumaa sevdayı gagauz türküleronä, gagauz filinä hem kulturaya.
«Sayȇrız, ani bizim adetlär lääzım tutulsunnar, lääzım gelmää, pay almaa bölä olaylarda, biz lääzım tutalım aklımızda neredän biz geldik, neredän çıkmamız».
«Çok türkü bileriz, çok türkü yazȇrız kendimiz, lafları kendimiz da çalȇrız. Bu festivalä da, açtılar telefon, sordular çalalım bir- iki türkü, kayıl olduk… Önemni o beterä, ani bizim Gagauziya unudulmasın».
VALENTİN ORMANJI Gagauziya şannı artisti
«Bölä festivallär yaşadȇr gagauz kulturasını, gagauz dilini, onuştan bän pek sevinerim, ani pay aldım, başka keret ta pay alȇrım, sanȇrım, ani lääzım uşaklar da pay alsınnar».
Festivalin baş neeti onda, ki korumaa hem ilerletmää gagauz dilini, kulturayı hem halk yaradıcılıını. Bir sţenaya çıktılar nicä anılmış artistlär, ölä da başlayan genç türkücülär. Kendi becermeklerini gösterdilär pay alannar Çadırdan, Kiriettän, Baurçudan, Coltaydan, Aydardan hem başka erlerdän.
ANATOLİY TOPAL Çadır kasaba primarı
“Bu festival topladı Gagauziyadan en talantlı çalgıcıları. İsteeriz, ani o türkülär, ani var gagauz dilindä işidilsinnär — işitsin onnarı bütün dünnä, annasınnar, ani var gagauzlar, bizim var kulturamız , var bizim türkülerimiz, var bizim adetlerimiz, da adetlerimizi götürsünnär ileri».
Nışannandı, ani bölä olaylar vererlär kolaylık meraklandırmaa insannarı gagauz türkülerinnän hem yardım ederlär artistlerä göstermää kendi becermeklerini.
ANDREY MİHAYLOV Çadır muniţipiya nasaatçısı
«Biz isteeriz, ani gagauzlar birliktä olsunnar hem ürektän kuvetli.Yaşasın Gagauziya, yaşasın Gagauzlar birliktä, olalım kaavi».
«Gagauz türküsü» 26-ci festivalin pay alannarı kablettilär diplomnarı gagauz türkülerini ilerletmäk için.