Küçük Paskelä – ayırı bir gün ölülerin anması için. O geler Büük Paskellenin ikinci aftasının pazertesinä, da bu günä yaşayannar özelliklän hazırlanmaa başlȇȇrlar. Nicä onnar bunu yapȇrlar, taa derindän süjenimizdä annadacez.
Küçük Paskelenin önündä yaşayannar ilerdän başlȇȇrlar mezarlaa gitmää , ki kırnaklık düzmää – yaprakları toplamaa, hotarları eniletmää hem çiçek ekmää. Çoyu insana deyni bu kırnaklık diil lääzımnı için, ama eveldän kalma bir adet, angısı geldi bizä evlad boylarımızdan.
«Bän geldim toplamaa büün mezarları. Nicä ana-bobam gelärdilär,bän da hep ölä».
«Kazȇrız, tırmıklȇrız, yapȇrız kırnaklık. Her yıl yapȇrız onu, unutmȇȇrız , dädudan babudan kalma bunu unutmȇrız».
«Nicä deerlär: ne yaptılar sana – sän da lääzım onu yapasın. Ne anan-boban- sän da lääzım , da ne yapȇrsın onu da görersin».
Çoyu insannara deyni bu adet en ilkin verer bir gözäl kolaylık hatır gütmää sensellerä , onnarı aklına getirdip hem vakıdı fikirlän onnarlan geçirip.
«Biz her yıl geleriz. Burada benim çocuum, kocam , kızım onuştan herzaman gelerim dolaşmaa. Boyacam büün masayı, skemneyi ».
« Lääzım toplamaa , neçinki onnar bizim yakındaklarımız, ana-bobalarımız da biz borçluyuz mezarlıı pakta tutmaa».
Yaşayannar açıklȇȇrlar, ki mezarlıkta Küçük Paskeleyä karşı herzaman pak hem kırnak lääzım olsun.
« Paklayacez herersini, olsun gözäl . Pazertesinä lääzım mezarlaa gelmää. Hepsi insan bakȇr bu günä toplansın. Olsun pak, ne yapmaa , bakalım ne yapȇrlar , dolaşalım onnarı».
«Şindi hazırlanȇrız geldim, mezarcık pak, ama hep okadar geldim , ki hazırlanmaa Küçük Paskeleyä. Nicä biz kırnaklanȇrız Paskelä için, onnara da küçük Paskelä için bakȇrız pak olsun.Burası paksaydı – sanȇrım , ani öbür dünnedä onnar da sevinerlär».
«Her yıl geleriz perşembelerdä , düzeriz, paklȇȇrız, süpüreriz, koyȇrız çiçecik , ki gözäl, pak olsun . Onnara da Küçük Paskelä. Burada benim kocam gömülü , kaynam , kaynatam, kresniţalarım – Maria, Geoirgiy. Sevinerim, ani çok insan da var , ani hepsicii çalışȇrlar da gelerlär mezarlaa büünkü gündä».
Bu işleri yaparkana, önemni gübürleri ayırı erlerä toplamaa , ki mezarlıın içindä hem dolayında da paklık kalsın, açıkladı komunal çorbacılıı başı yardımcısı Pötr Peyоglo: « Hepsi , kim mezarlıkları toplȇȇr, lääzım çıkarsınnar gübürleri sokaa yada onun kenarına. Bundan sora bizim işleyennär toplȇȇrlar onnarı da transportlan getirerlär buradan».
Bu gün insana deyni en önemni , ki mezarlıkta paklık, düzennik hem saygı biri-birinä olsun.
« Bu ii bir adet. Elbetki, lääzım ölä da toplamaa , neçinki sora taa da bet olȇr, ama bu ii adetlän herersi pak olȇr».
Bu yaptıklarlan insan derin inanı hem saygıyı dedelerä gösterer. Onnara deyni bu gün maanaylan hem sevdaylan yakındaklılara dolu, getirderäk aklına kolboyları, angılarınnan baalantı çözülmäz.
Moldovanın hem Gagauziyanın en mekalı haberleri GRTnın Telegram kanalında!