39 yıl geeri Çernobıl atom stanţiyasında patlatmak oldu, da bu avariyanın çıkışlarını bütün sovet birliindän uzmannar yok edärdilär. Çiçek ayın 26-da Gagauziyada andılar Çernobıl avariyanın çıkışların yok etmesindä pay alannarını.
Çernobıl avariyası bir büük katastrofaydı atom energetikasının istoriyasında. Çok radioaktiv material sıbıdıldı dolay çevrisinä. Avtonomiyanın askercileri dä katıldılar avariya çıkışların yok etmesinä. Emanuil Velikov Gagauziyanın Çernobıl olaylarında pay alannarın kurumun başı 1986-ci yılda askerä çaaran merkezin kararına görä Çernobıla düştü.
«Bizdä vardı maasuz punkt, neredä tehnikaya, angısı sınır aşırı gidärdi , dezinfekţiya yapılardı. Hep ölä üçüncü bloku paklamaa gidärdilär askercilär. Parçalarlan yıkardılar duvarları makar ki biraz toplamaa o zihirleri»,- Emanuil Velikov nışannadı.
Ozaman himik- dozimitrist Vasiliy Stanţoy, annayıp avariya için, bilärdi, ani onu orayı yollayaceklar.
«İlkin biz çıkardık da bakardık radiaţiya uurunu erlerdä kvadratlara görä. Koyardık bayracıkları da bakardık, nesoy radiaţiya uuru hem nekadar vakıt orada var nasıl bulunmaa. Sora da gidärdilär başkaları işlemää. Orayı lääzımdılar şoferlar, düzücülär, neçinki lääzımdı kazarma yapmaa»,- Vasiliy Stanţoy açıkladı.
Çernobılä düştü Çadır kasabasının yaşayanı da Nikolay Petkoviç. O aklına getirer, nicä gecä evä iştän geldi, neredä ona verdilär povestkayı. Orada istenärdi o asker merkezinä gelsin. Şansora saat altıda sabaaylen o merkezdäydi, ama üülendä asker formasınnan Odesadaydı.
«Bizi ilk çaardılar orayı. Bän armatada himiktım hem da bölümün başın yardımcısıydım. Da te çaardılar. Kimsey bilmärdi, nereyi bizi alaceklar . Bän baktım asker zanaatlar listesinä da üürendim, ani bizi Çernobılä yollȇȇrlar. Benim daavamdı osoy- bän üç çocuklan izmet edärdik yol boyunda. Da ölçärdik dozimetraylan radiaţiya uurunu, bän dä onnarı yazardım kiyatlara»,- açıkladı Nikolay Petkoviç.
Çiçek koymak olayına katıldılar avariya çıkışların yok etmesindä pay alannarı, dolay hem muniţipiya kuvetlerin temsilcileri. Komrat dolay administraţiyasının başı Vadim Çeban söz tutup mitingta, nışanandı, ani Çernobıl atom stanţiyasında avariya — o 20-ci asirin en büük katastrofası.
«Biz isteeriz nışannamaa onnarı, kim zor vakıtta oldu girginniin örnäännän, korudu hepsini hem da gelecek evlad boylarını çok yıllara. Sizä lääzım hatır güdelim hem aklında tutalım, ani siz kurtardınız bizi radiaţiya zihirliindän»,- söledi Vadim Çeban.
Komrat kasabasının primariya uzmanı Olga Patutina nışannadı, nekadar önemni Çernobıl avariya çıkışların yok etmesindä insanın kahramannıı.
«Hepsi, kim öldü, aklımızda hem cannarımızda kalaceklar. Sizä, kim yaşȇȇr, isteerim adama saalık hem aylenizä uygunnuk. Bütün dünnedä da raatlık olsun»,- Olga Patutina nışannadı.
Gagauziya Şannı jurnalisti Anna Jekova çok yazdı Çernobıl pay alannarı için. O nışannadı, ani bu girginnik hem kıyaklık.
«Benim tefterimdä var resim, angısını yaptı bir adam. O gösterdi kendi yolunu iki ayın içindä, açan Çernobıl zonasında bulundu. Orada yok bir da er, neredä o bulunmadı, herbiri onnardan yaptı hepsini, ne lääzımdı. Onnar bilärdilär, eer kurtularsaydılar, ozaman Alla yardım etti. Büün acı bir yortu. Çernobıl pay alannarın gimnasında var laflar- biz yaşacez, uşaklar büüyeceklär, ama bizim sevinmeliimiz — o pelin acısı»,- Anna Jekova nışannadı.
Komrat kasabasında 2019-cu yılda açıldı Çernobıl olayların yok etmesindä pay alannarın anmak taşı. Burayı her yıl gelerlär avariya çıkışların yok etmesindä pay alannarı Gagauziyanın hepsi küüyülerindän hem onnar, kim isteer bu insannarı anmaa.
Moldovanın hem Gagauziyanın en mekalı haberleri GRTnın Telegram kanalında!