Çeşmä hem Etuliya küüyüleri baalayan yolun düzülmesi proekti başladı. Bu işlerä para regionun bücetindän veriler.
Çeşmä- Etuliya yolun düzülmesinnän baalı proekt en önemni infrastruktura proektlarin birisi, angıları bücettän finanslanȇr, nışannadı Gagauziya Başkanı Evgeniya Guţul. Yol düzülmedi çok yıl da kötü halda bulunardı. Başkan urguladı, ani bu obyekt pek lääzmnı küü yaşayannarı için, neçinki bu yol baalȇr onnarı başka küüyülärlän.
«İsteerim sölemää, ani bu en paalı infrastruktura proekti, angısı bücet paralarınnan yapılȇr. İsteerim sölemää, ani bu yol — baş yolu iki küüyün insannarı için. Elbetki biz durgunmayacez ileri dooru da işleyecez. Hep ölä bizdä bir infrastruktura proekti yapılȇr Kazayk küüyündä, orada sap yolu düzüler»,- nışannadı Gagauziya Başkanı Evgeniya Guţul.
Yaşayannar nışannȇȇrlar, ani bu yolun düzülmesindän sora buradan taa yakışıklı hem uygun gezmää olacek.
«Sevinerim, ani bu yol düzüler. Bu pek islää. Gezecez islää yoldan. Çok saa ol, ani yolları yapȇrsınız. İleri dooru da isteeriz, ki hepsi yollar Valkaneş dolayında yapılsınnar, neçin ki Gagauziyanın en bitki kenarına az para hem vakıt veriler infrastrukturanın rekonstrukţiyasına hem ilerlemesinä».
Valkaneş dolay administraţiyasının haberlerinä görä yolun düzülmesinä verildi 11 million ley, ne verecek kolaylık eniletmää yolun 17 bin kvadrat metrasını.