Dezginja küüyündän çiftçi çorbacısı eni tehnologiyaları kullanȇr, ki klimat koşulları çiftçilik bölümünä deyni taa uygun olsunnar. Gagauziya Çiftçilik bakannıında nışannȇȇrlar, ani lääzım uzmannarın nasaatlarını esaba almaa. Erliim bunu yapmamaa klimat diişmekleri var nicä kötü belli etsinnär kendini çiftçilik bölümündä.
Zamandaş tehnologiyaları kullanȇr Dezginja küüyündän çorbacı Georgiy Kiroglo. Yardım eder ona bu iştä Estoniya kompaniyası, angısı klimata uygun tehnologiyalarına görä çalışȇr. Gagauziya Çıftçılık bakanı geçirdi çiftçi çorbacılarına deyni seminar. Bakannıın uzmanı Silviya Tomaylı nışannadı, ani olaya teklif edildi avtonomiyanın çiftçileri.
«Topraan dooru kullanması büük rolü oynȇȇr , ki uglerod kalsın toprakta da klimat koşulları taa uygun büümnerä deyni olsunnar. Bu programa verer kolaylık fermerlara kvotalara para kabletmää»,- söledi Gagauziya Çiftçilik bakanı uzmanı Silviya Tomaylı.
Georgiy Kiroglo oldu ilk, kim eni metodları kullanȇr. 80 ektarda o ekti booday kulturalarını, kullanarak eni tehnologiyaları.
«Seminardan sora bän meraklandım bu programaylan. Kararladık 80 ektar ekmää bizim tohumnarınnan. Deneyecek bu metodları. Yıldan yıla lääzım düşünmää, nicä yapma ölä, ki toprak taa zengin olsun. Biz bu yıl genä bizim tohumnarımızı ekecez, burada maasuz gorohu ekeceez. Bu kulturalar topraa taa kaliteli yapȇrlar. Düşünerim, ani gelän yılda gerbiţidlarsız işleyecez, yok bir da ot»,- nışannadı Georgiy.
Çiftçi Georgiy Kiroglo sayȇr, ani problemaların çözülmesi klimat koşullarınnan baalı. Bunun için lääzım diiştirmää çiftçilik bölümün kurallarını.