Gagauziyada ilkyaz kır işleri başladılar. Çiftçilär söleerlär, ani güzdän ekili kulturalar çıktılar, onnar ii halda hem ii berekedä umut vererlär.
Kış bu yıl yımışak oldu. Çiftçilär ilkyazın güzdän ekilmiş kulturaların halını notalȇȇrlar. Bakmayarak ona, ani fevral ayında birdän suuklar bastılar, martta da birdän sıcaklar geldilär, güzlüklerin durumu ii uurda bulunȇr, nışannadı Gagauziya Çiftçi bakanı Sergey İbrişim: «Gecä zamannarında temperatura sıfırdan aşaa olȇr, gündüz dä 20 gradus. Gündüz hem gecä temperaturaların arası 18 gradusadan. Büüyümnerä deyni bu diil pek islää. Ama bakmayarak buna, çiftçilär büüyümneri kaaviletmää hem korutmaa deyni hepsi lääzımnı işleri geçirerlär».
İvan Mardar çiftçiliindä 1000 ektarda yakın güzlük kulturaları ekili. Büüyümnär pek islää kışladılar, nışannadı çiftçi.
«Ekinnär büün islää halda bulunȇrlar. Güzdän yaamurcuk yaadı, onnar islää çıktılar, kökleştilär hem kardaşlandılar. Raps da ii uurda büünkü gündä bulunȇr. Büüyümnär uyandılar sıcakların gelmesininnän, bakmayarak ona, ani gecä saatlarında temperaturalar taa sıfırdan aşaa, er gündüz yısınmaa başladı»,- dedi Mardar.
Sergey İbrişim nışannadı, ani güz yaamurları yardım ettilär toprakta nemnii korumaa. Büünkü gündä çorbacılar büüyümneri gümrüklärlän kaavilederlär.
«Gagauziya meralarından 78% şansora gümrükleri kablettilär. Bu yıl Gagauziyada 36000 ektar güzlük kulturası var. Onnardan 5-600 ektar arpa, 9 buçuk ektar güzlük hardalı. Büünkü gündä onnar da ii durumda. Var kimi meralar, angıları pek islää uurda bulunȇrlar. Sıcaklar büünkü gündä verdilär kolaylık büüyümnerä ilerlemää»,- Sergey İbrişim nışannadı.
Gagauziya çiftçileri umutlanȇrlar, ani ii havalar vereceklär kolaylık büüymnerä ilerlemää hem zengin berekedi elä almaa.
«Biz oktäbrinin ilk günnerindä ektik bu merayı. Güzdän yaamurcuk yaadı da bir ekinciktän 5-6 kardaş oldu. Şindi lääzım onu kaavileştirelim başaklar dolu hem bereketli olsunnar deyni»,- nışannadı çiftçi.
En yakın günnerdä Gagauziyada yaamurlar beklenilerlär, bu iş güzlüklerin ilerlemesinä ii gidecek, nışannȇȇrlar uzmannar.
Avtor: A. Terzi, operator: V. Kıssa, montaj: A. Gerçu
Moldovanın hem Gagauziyanın en mekalı haberleri GRTnın Telegram kanalında!