Çiftçilik bölümü Moldova devletindä — sektor, angısında en çok kanona karşı para kazanması belli ediler. İş inspekţiyasının haberlerinä görä, yakın 61% işçi çalışȇrlar neformal ȇkonomikda agrar sektorunda. Bu pek belli eder diil saade memleketin ȇkomomikasında, hem taa angı sektorlarda, annadacek Polina Barbova.
Kanona karşı para kazanmasının olayları, bölä nicä «kazanç parası konverttä» zeedelener Moldova devletindä, haberledi iş inspektoru İvan Komur. O nışannadı, ani lääzım iisiltmää kanona karşı gitmeklerini, angıları taa sık çiftçilik sektorunda belli olȇrlar. Bundan kaare önemni insannar için taa islä koşulları yapmaa.
«2025 — ci yılda Gagauziyada belli oldu yakın 60 olay. Bu olaylar olȇrlar diil saae çiftçilik bölümündä, ama başka sektorlarda da»,- haberledi iş inspektoru İvan Komur.
Bu işçileri hem da iş verenneri diil ii hala götürer. Kontroletmeklerin çıkışlarına görä, angılarını geçirdi Devlet iş inspekţiyası 2024 — cu yılda, belli oldu 3088 kişi, angıları diil ofiţial işä alındılar.
«İşçilerdä yok soţial hakları, yok hakları islä yaşamaa. İnsan kablertmeer lääzımnı mediţina yardımını, hep ölä yok mediţina sigorta polisleri. İnsanın yok kolaylıı kabletmää islä pensiya parasını, neçinki bu yıllar iş stajına girmeerlär»,- haberledi İvan Komur.
80% diil ofiţial iş olayları iş inspekţiyasının hatırınnan yokedildilär. Kontroletmeklär iliştilär bölä sferalara, nicä — agrar sektoru, düzücülük hem HoReCa sektoruna.
«İsteerim danışmaa iş verennerinä hem da işçilerä — lääzım savaşmaa yapmaa ölä, ki insannar kanona görä işlesinnär»,- dedi Komur.
Moldova devletindä diil ofiţial iş olayların sayısı kurȇr yakın 23%, taa zedesi (61%) agrar sektorunda, (22%) düzücülük sferasında, HoReCa bölümündä (7%). Vergi kayıplı kurȇr 15 — 20 milliard ley yılda.
Moldovanın hem Gagauziyanın en mekalı haberleri GRTnın Telegram kanalında!