Komrat kasaba gününä karşı kutlanıldı çiftlär, angıları 50-55 hem 60 yıl barabar yaşadılar. Bu yıl yortulu gündä onnar getirdärdilär aklılarına ilk buluşmaklarını, yıllarını hem kabledärdilär primariyadan gözäl kutlamakları. Nicä geçti bu yortulu olay – süjetimizdä üürenecez.
Her yıl kasabanın duuma günün önündä kutlȇȇrlar çiftleri , angıları 50,55 hem 60 yıldönümünü yortulȇrlar. Onnara adȇȇrlar saalık hem en ii şükürlemäk lafları, açıkladı Komrat kasabanın primarı Sergey Anastasov.
SERGEY ANASTASOV Komrat kasabanın primarı
« Büün yortu , onuştan ilkin kutlȇȇrız bizim çiftleri, kim bukadar yıl birliktä yaşadı. Umutlanȇrız,ani onnarın sayısı ötää dooru taa zeedelenecek. Sanȇrım, ki bu adetlär ilerleyeceklär taa , neçinki siz bizim örneemiz. Gençlär te bakȇrlar büün sizä. Dileerim sizä bütün ürektän saalık , uzun ömür hem ko hepsi yakındakılar yanınızda olsunnar».
Bu aylelerin ardında yıllar kaldı, angıların içindä vardı hem mutlu hem da zor durumnar. Ama onnarı bu taa da pek birleştirdi.
«Biz çok yıl birliktä yaşadık , ko gençlär da bukadar yaşasınnar. Oldu zor günnär dä , mutlu da. Yok ölä aylelär , ani hepsi herzaman olsun».
Kutlamaklaran paylaştı Komrat kasaba sovet başı Georgiy Vlah da.
GEORGİY VLAH Komrat kasaba sovet başı
« Sizin ayleleriniz bizä deyni örnek nicä lääzım sevmää, saymaa, düşünmää biri-birimizi. Sizin ardınızda çok mutlu yıllar var».
Herbir aylenin kendi istoriyası var. Kimsä kendi sevdasınnan oyunnarda, yortulu olaylarda buluştu , kimsä da ansızdan onu buldu.
«O transportta evä gidärdi. Durgundu , aldı beni evä da ölä da tanıştık».
«Tutȇrım aklımda. Biz kendimiz Beşalmadanız, orada her afta oyunnar olardı. Gittik orayı da tanıştık».
O tanışmak vakıtlardan çok yıl şnänsora geçti. O yılların süresindä aylelär büüdülär , duudu uşaklar , nepotular , onnarlan barabar da zeedelendi mutlu kıpımnar.
«55 yıl mutlu hem şen yaşamak geçirdik. Bizdä 3 uşak hem 7 nepotu var. Biri-birimizi sayȇrız hem herzaman tutturȇrız”.
«Beenerim kendi kaarıcımı. Ayırı tutȇȇım mutlu zamannarı , açan bizdä 2 çocuk duudu».
«Zordu kimär keret , ama hepsinä dileerim dayanmaa biri-birinä , annamaa hem ko sizin aranızda sade sevda , annaşmak hem iilik olsun. Sade onnar bu yılları toplȇȇrlar».
Çiftlär açıklȇȇrlar , ki saklılık birli yaşamakta yok, var sade zorluklara bakmayar biri-birini saymak hem sevdayı duymak.
«Saklılık hiç yok. Sade sesirgenmää hem saymaa biri-birinizi lääzım».
Herbir bölä çiftçilerin yıldönümün ardında var türlü olaylar, ama en önemni onnarın becermerkleri bu sıcaklıı hem sevdayı yıllar arası korumaa hem ilerletmää.