Çoban zanaatı taa evelki vakıtlardan biliner. Bu insannar ev hayvannarını güderlär. Onnar çıkarȇrlar sürüleri da bakȇrlar onnarı.
Becerekli çobannar herzaman bilerlär vakıdı hem eri, neredä hayvannar var nasıl doyunca iisinnär hem su içsinnär. Bölä işä çok vakıt hazırlanȇrlar, kabledip lääzımnı becermekleri hem bilgileri. Grigoriy İvanoviç Kurdoglo Aydar küüyündän küçüktän istärdi çoban olmaa. Kıra o çeketti gezmää kendi komuşlarlan da yardım edärdi onnara koyunnarı gütmää.
«Beenerim hayvannarı, hem evdä olsunnar. Koyun bakmasınadan düzüntücülük uurunda işledim, ama beenmedim da istedim koyunnarı bakmaa. Severim bu işi»,- dedi çoban.
Çoban olmaa diil ilin. Bu pek cuvaplı iş. Herbir çoban lääzım kaavi hem da açıkgöz olsun hem bilsin, ani onun işi bilmää bütün süreyi hem ayırı- ayırı herbir hayvanı, söleer Grigoriy Kurdoglo.
«Karannıktan karanadaan. Erken kalkȇrsın, geç gelersin. Saat beştä sabaaylen buradayız, avşamnen da saat 11-12-dä gelersin»,- söleer Grigoriy İvanoviç.
Çoban için en zor- bütün gün ayakta bulunmaa. Bir gündä çoban geçer 6-9 kilometra, ki hayvannarı doyurmaa hem sulamaa. Nicä söleer Grigoriy İvanoviç, bu yılkı hava koşulları, kuraklık hem sıcak zorlattılar çobannarın işini.
«Sulamaa hiç yok neredä, su yok. Aulun bitkisindä koyduk yalakları da pınardan nasoslan suyu vereriz. Gütmää da bu yıl yoktu neredä, ama yaamurlardan sora ot peydalandı, da taa ii oldu»,- sayȇr Grigoriy.
Çobannar herzaman annȇȇrlar hayvannarı kendi sürüdän. Onnar lääzım herbir hayvanı duysunnar hem bilsinnär, nicä ona yaklaşmaa, sayȇr Grigoriy İvanoviç Kurdoglo.
«Bakȇrsın hayvannarı, bişey olmasın. Olȇr topallȇȇrlar, türlü olȇr. Bakmaa lääzım onnarı»,- çizgiledi Kurdoglo.
Herbiri çoban yok nicä olsun. Bunun için lääzım bilgilär olsunnar hem da lääzım hayvannarı sevmää, urgulȇȇr Grigoriy Kurdoglo.
«Lääzım bilmää, ne yapmaa, nicä saamaa, gütmää. Diil ölä, ani kıra koladın da bitti. Bölä olmaz. Lääzım doyurmaa, saamaa. Zor iş, herbiri yapamayacek bunu»,- emin çoban.
Çobancılık en eski zanaatların birisi Moldovada, ama o kaybelmäk uurunda bulunȇr. Fermerları kahırlandırȇr bu iş hem da onnar aalaşȇrlar, ani taa zor olȇr bulmaa insannarı, kim hayvannarı gütmää isteer. Çiftçilik ministerliin haberlerinä görä şindiki vakıt devlettä 410 bin koyun var.