Gagauziyada bakȇrlar imek yapmak adetlerini, angıları dedelerdän evlad boylarına geçerlär. Birisini onnardan Hederlez yortusu için yapȇrlar –o bulgur. Bu milli imek bulunȇr masada diil sade yortularda, ama sıradakı günnerdä dä. Hederlez yortusuna karşı Beşalma küüyün yaşayanı Lübov Kapaklı annattı bulgurun hazırlamasında kendi özellikleri için.
Bulgur koyun yaanısınnan- bu gagauz milli imeklerin payı. Onu pek sık yapȇrlar aylä yortularında, gösterip bununnan musaafircilii hem dedelerimizin adetlerinä saygıyı. Bulguru yaparkana sık kullanȇrlar çok kokuluk, ki imek olsun datlı hem gözäl kokusu olsun, söleer Beşalma küüyün yaşayanı Lübov Kapaklı:«Taa ileri haşlattım ceerleri. Da onnarı doorȇrız belli olsun. Açan aazına geler, belli olsun, ani ceercääz. Bulgurda kaşa olmasın. Bulgur beener yaalı olsun. Kuşların yaasını kaurdȇrım».
Bulgur gagauz imeklerin arasında ayırı bir erdä bulunȇr. O pek datlı, gözäl kokuylan, yaanıylan hem zarzavatlarlan yapılȇr, hem tok tutȇr, söleer Lübov Kapaklı: «Haliz ona girer iki ikiüzgramnık borkan. Bir tencereya bukadar eter. Herbir manca beener suvanı. Manca açan suvannı, morkvalı, kokusu da hepsi lääzım olsun».
Hepsi çorbacıykalar bulguru kendiycesinä yapȇrlar, ama var bir adet bu imeenin yapmasında- o fırında pişirmesi. Bulguru fırında yaparkana, o pek datlı hem unudulmaz kokusunnan, neçinki soba içindä o pişer, söleer Lübov Kapaklı: «O bulgur ne tatlı olardı hem da ileri yapardılar ekin bulgurundan. Ondan taa tatlı bulgur olȇr fırında. Pek beenärdim o bulguru. O fırında olȇr fit başka».
Yortulu masaya bulguru koyȇrlar pişmiş yaanıylan yada sarmaylan. Var nasıl gözlemäylän, nicä bunu yapȇr Lübov Kapaklı.
Yortulu olaylarda, haliz Hederlezdä, geçerlär master- klaslar turistlerä deyni, neredä diil sade daatmaa bulguru, ama üürenmää onu yapmaa var nasıl. Bölä kolaylık olacek bu yıl da musaafirlerdä, angıları geleceklär Hederlez yortusuna Çadır kasabasına.
Moldovanın hem Gagauziyanın en mekalı haberleri GRTnın Telegram kanalında!