Gagauziyanın Üüretmäk Bakannında üüdedicilär hem administratiya temsilcileri geçirdilär cümnä seslemekleri eni Üüretmäk kanon proekti için. O doorudulu kurmaa zamandaş hem ii üüretmäk sistemasını, angısı alȇr esaba regionun milli hem dil özelliklerini. Temayı illerleder korespondentımız.
Kanon proektinä girerlär maasuz işlär,angıları doorudulu üüseltmää üüretmäk sistemasının kalitesini hem yapmaa taa ii dil üürenmesi koşullarını, urguladı Üüretmäk bakanı N.Kristeva. O nışannadı,ani en özel eri dokumenttä alȇr dil hakların genişletmesi.
«En ilk –bu dil politikası regionda,gagauz dilin üürenmesi hem onun statusun kaavileşmesi, onuştan da bu soruşa adalı çok statyalar. Çok dillerin giriştirmesi da aktual avtonomiyada, uşaklar üürenerler devlet, ana hem yabancı dilleri, biz bu proekti geçireriz,da geldi vakıt onu kanon uurunda da tutturmaa»,- dedi Kristeva.
Dokument belli eder gagauz dilin taa geniştän üürenmesini, adetleri hem istoriyayı.
«Kanonda lääzımnı uurda belli ettik kendi istoriyanın,dilin,kulturanın hem adetlerin üürenmesini hem alternativa istoriya sızıntıların kullanmasını, uşaklarda olsun kendi kritika fikirleri hem kendi bakışları istoriyaya hem dolayda olaylara»,- nışannadı üüretmäk bakanı.
Kanon proekti tutturȇr Gagauziyanın hakını kendibaşına gözletmää üüretmäk proţeslerini, angıları belli edili devletin kanonunda. Proekt cuvap eder milli normalarına. Cümnä seslemeklerin pay alannarı ii notaladılar eni Üüretmäk kanon proektini. Kendi bakışınnan paylaştı Kongazçik küüyün gimnaziyası başı Elena Statova: «Bu dokument çok ii hem vakıtça kuruldu. İş gruppası büük zaametleri koymuş onun kurması için da almış esaba lääzımnı işleri. Dooru hem uygun kurulu dokument, bu üzerä da seslemeklerin vakıdında başka nasaatlar verilmedilär».
Yakın zamannarda dokument heptän hazır olacek, dorulacek kabledilmiş tekliflärlän hem nasaatlarlan seslemeklerin vakıdında,da yollandırılacek GHT deputatların gözletmesinä. İlerki Üüretmäk kanonunu dava kuruluşu 2018 yılda kabletmedi.
Moldovanın hem Gagauziyanın en mekalı haberleri GRTnın Telegram kanalında!