Aydar küüyün Födor Angeli adına gimnaziyasında 9-cu klasların arasında debatlar geçtilär — pay aldĩlar burada üürenicilär Coltay, Timay hem Aydar okullarından. Buluşmanın baş teması- gagauz dili ilerleer mi osa kaybeler mi?
Gagauz dili ilerlemesi için debatlar 5 raunda sürttülär. Komandalar var olan problemaları açıkladılar, teklif ettilär kararları hem aaradĩlar cuvap en önemni soruşa — var mı gagauz dilin gelecää? Pay alannar üüsek uurda gösterdilär kendi bilgilerini hem argumentleri getirdilär. Bütün olay gagauz dilindä geçti.Lafetmeklerin çıkışlarına görä, okulcular belli ettilär, ani dilin ilerlemesi herbir kişidän çekiler- nekadar sever onu, nekadar sık onda lafeder hem üüreder mi uşakları.
«Umutlanȇrım, ani biz taa çok bölä toplanacez, ani çaaracez küüleri, bizim komuşularımızı. Ana dili bana deyni benim canımın bir payıydı, bän nicä duudum, ana hem boba bennän lafedärdilär sade gagauzça, o benim bän düşünerim gagauzça, lafederim gagauzça her keret».
«Ana dil pek önemni bizim için iş, onu lääzm ilerletmää, o olmarsaydı biz kaybedecez hepsini.. вырезать Debatlar pek önemni bizä deyni, biz burada çok üürendik, çok nasaat kendimizä aldık neçin ki herbir küü verdi en önemni işlär bizä deyni, biz annadık ne lääzım yapmaa, ne lääzım korumaa hem alacez kendimizä büük nasaat».
Komandaların işini notaladılar jüri azaları, urgulayıp, ani üürenicilerin gagauz dili uuru üüsek.
Alla Kapsamun, jüri azası, muzey direktoru: «Onnarın dili pek gözäl uurda bulunȇr, 9-cu klaslar pek gözäl lafederlär, onnar kullanȇrlar dili evdä da, ama şindiki uşaklar, küçükleri lääzım taa biraz işlesinnär. Onnarın argumentleri pek gözäl, kullanmak için dili, ani korumaa onu lääzım ötää dooru da».
Födor Angeli adına gimnaziya başı hem gagauz dili üüredicisi Nadejda Koçanji nışannadı, ani bölä olaylar yardım ederlär ilerletmää gagauz dilini hem kurmaa üürenicilerdä aktiv cümnä uurunu.
«Biz dostlaştık komuşularımızlan — Tomay hem Coltay gimnaziyasınnan, çok saa ol deerim müdürlerä, ani katıldılar bu ideya. Sevinerim, ani uşaklar geldilär, okadar gözäl açıkladılar kendi bakışlarını, argumentleyip söledilär, geldilär gözäl çıkışlara, kurdular meraklı adamakları, duaları. Belli, ani uşaklar isterlär, severlär var gagauzluun özü, angısı koruyacek dilimizi, sevinerim, aniuşaklarımızda var o istedik, havez, onnar motivlı, çok keret bu iş sölenildi. Onnar saer hem kullanȇr gagauz dilini aralıkta da, serbest lafederlär»,- Nadejda Koçanji nışannadı.
Debatlardan sora üürenicilär muzeya gittilär, neredä onnara taa derin gösterdilär hem annattılar gagauz kulturası için.
Moldovanın hem Gagauziyanın en mekalı haberleri GRTnın Telegram kanalında!