Çadır kasabasının Mihail Guboglu adına liţeyindä geçti meraklı olay — debatlar Karl Popperın formatına görä. Açık ders hazırlandı regional metodika birleşmesinin sınırlarında. Geçirdi onu liţeyin psihologu Valentina Genova.
İki komanda — 11-ci klasın üürenicileri — komanda, angısı kayıllık eder ikinci komanda sa lääzım göstersin, ani soruş fayda getirmeer. Debatlara çıkarıldı önemni tema «Ţifrovizaţaya fayda getirer üürenicinin ilerlemesindä». Herbir taraftan lääzımdı getirmää çok argumentleri da göstermää kendi dooruluunu. Belliydi, ani pay alannar üüsek uurda hazırlanmıştılar — aaraştırmışlar çok informaţiya, argumentleri bulmuşlar, üürenmişlär oponentları seslemää hem açıklamaa kendi düşünmeklerini. Debatların pay alannarı kendi duygularını açıkladılar.
«Elbetki, bän pek dalgalandım, ama istedim, ki burada bulunan kişilär dooru annasınnar bizim komandanın uurunu, bakışını, argumentleri da bizim tarafı alsınnar, sanêrım, ani bän kendi işimi islää yaptım».
«Oyunun süresindä bän dalgalanmayı duymadım, neçinki ölä dä düşündüydüm, ani uslu olacek, gösterdik hem duyduk saygıyı oponentlara. Beendim, nicä bizim komanda çalıştı hem nicä öbür komanda oynadı».
Taa debatlar başlamadıynan duyulardı salada dalgalanmak, azart hem saygı. Komandanın herbir spikerinä verildi vakıt, angısından onnar hepsi tutundular. Argumentleri herbir taraf açıkladı. Nicä söledi psiholog, Gagauziya üüretim bakannıın uzmanı Svetlana Kviţinskaya, bölä olaylar çok fayda getirerlär üürenicilerin ilerlemesinä.
«Benin bakışıma görä, olay pek meraklı geçti. Bölä format maasuz bu yaşta uşaklara uydu — onnar üürenerlär konţepţiya yapmaa, kritika uurunda düşünmää, gelän vakıt için düşünmää. Sayȇrım, ani hepsi daavaları, angılarını koydu Valentina Ivanovna, hepsi yapıldı 100 proţendä»,- söledi psiholog, Gagauziya üüretim bakannıın uzmanı Svetlana Kviţinskaya.
Psiholog Valentina Genova olayın kurucusu hem debatların götürücüsü nışannadı, ani bölä buluşmakların baş neeti — ilerletmää uşaklarda kritika düşünmeyi, üüretmää seslemää hem dooru açıklamaa kendi tarafını.
«Bölä formatı biz liţeydä çoktan kullanêrız, bän, nicä psiholog, esaba aldım, nekadar fayda olêr uşaklara ayırı onnarın emoţia uurunda, hep ölä da ilerleer onnarın düşunmekleri hem taa başka becermekleri. Ayırı bu format, açan uşaklar kendileri hazırlanêrlar hem debatlara oturêrlar, nekadar o üüsek uurda ilerleder üürenicileri herbir taraftan»,- Valentina Genova nışannadı.
Debatların çıkışlarına görä, siiredicilerin seslerinnän ilk eri kazandı kayıllık komandası, angısı gösterdi, ani Ţifrovizaţaya diil duşman, ama yardımcı o zaman, açan kafaylan onu kullanêrsın.
Moldovanın hem Gagauziyanın en mekalı haberleri GRTnın Telegram kanalında!