Kirsovo küüyündä geçtilär yortulu toplantılar, angıları adalı prostolmak aftasına. Yortuların kurucusu sayılȇr küü muzeyi.
Yortunun pay alannarı oldular Kirsovo küüyün iki okulun üürenicileri.Onnar için hazırladılar halk oyunnarını, konkursları hem türlü meraklı işleri. Büük yaşta insannar getirdilär evdän kendi imeklerini. Neçin bu yortu pek paalı insannar için, annattı “SEDÄNKA” kollektivin pay alanı Anna Nägova: «Bana deyni bu yortu paalı, neçinki ilkyaz gelecek, da biz sevinecez yaza, sıcaa. Bekleeriz bu yortuyu, ki taa hızlı geçsin suuk kış».
Genç pay alannar hazırladılar yaratma nomerları. Nicä nışannadı Kirsovo küüyün muzeyin başı, yortunun kurucusu Evdokiya Stoynova, aktiv kendilerini belli ettillär uşaklar konkurs programasında.
«Prost olmak — biz bileriz, ani bu konkurslar, adetlär. Da bunu, bän esap aldım, ani onnar sevdilär taa pek. Onnar aktiv katıldılar. Kayıl oldular. Bän sayȇrım, ani bizim toplantının bu momenti oldu baş onnar için hem da en meraklı»,- Evdokiya Stoynova nışannadı.
Yortunun gözellii oldu Komrat kasabasının yaşayanın Arnaut Mariyanin sergisi, angısı annadȇr onun aylesinin istoriyası için.
«Hepsini, ne bän yapȇrım evdä, hepsi bu adetlär, angılarını savaşȇrız unutmamaa hem da ilerletmää, bana hepsini bunnarı annattıydı anam. Da bän saydım, ani bu ȇkspoziţiyanın baş erini lääzım o kaplasın, neçinki büyüttü 5 uşak, hepsinä bizi üretti, ne kendisi bilärdi»,- Mariya Arnaut nışannadı.
Aylä adetleri için hem da millet imekleri için prost olmak aftasında getirerlär aklılarına pay alannar da.
«Bizdä vardılar rugaçkalar, mamu pişirärdi katmiçkileri, yoktular akıntılar. Te bu vardı bizdä. Prost olmak aftası — bu diil sade şennik, ama vakıt prost etmää biri — birimizi, söleerlär toplantınım pay alannarı».
«Kiminnän karşı gelerim — bizim yortuylan kutlȇȇrım. Alla verdi bizä bölä kaar, şükr ederim Allahı. Biz yalvarȇrız sizi prost edäsiniz».
Yortunun kulminaţiyası oldu adet ateşi, angısı tuşturuldu kultura evin önündä. Hep ölä burada öttüllär türkülär, oynadıldı horu hem da adetä görä ateşin üstündän atlamak — nicä prost olmak kışlan, hem ilkyazın karşılaması. Pometkova Annanın laflarına görä, bölä yortular yardımcı olȇrlar korumaa vakıtlar baalanısını hem da geçirmää adetleri uşaklara.
«Biz oturduk, türküleri çaldık, oynadık, ateşin üstündän atladık. Pek isläydi. Bunnarı hepsini bizä geçirdilär bizim ana — babalarımız, da bän sayȇrım, ani bizim uşaklarımız da ilerledeceklär bunu»,- Annanın laflarına görä.
Yortu Kirsovo küüyündä topladı insannarı türlü yaşlarda, nekadar ki korumaa halk hem din adetlerini.
Moldovanın hem Gagauziyanın en mekalı haberleri GRTnın Telegram kanalında!