Açık seslemeklär Seçim kodeksi kanon proektinä diişmeklerin giriştirmesinnän baalı Komratta geçtilär. Onnarı hazırladı hem geçirdi GHT reglament, imunitet hem deputat etikası komisiyası.
Seçim kodeksinä diişmekleri için kanon proektin avtoru GHT başın yardımcısı Georgiy Leyçu. O nışanandı, ani işlettirilmiş diişmeklär cuvap ederlär prinţiplerä, angılarını hazırladı Evropa Soveti, ne baalı seçimnärlän, hem angısını Veneţian komisiyası kabletti. O urguladı, ani onnarın kabletmesi lääzımnı, ki seçim kanonnarında stabil durum olsun, hem aaz sayıda halkların hakları korunsunnar.
«Moldova kanonnarı ayırı, da seçim kodeksinnän bakılȇr yaşamak uuru , erindeki seçimnär hem Evropa partnörları için prinţiplär. Hep ölä bakılȇr kolaylık yaşamak uurun belli etmesi uzun vakıda. Nasaat ediler beş yıl»,- Georgiy Leyçu açıkladı.
Georgiy Leyçu açıkladı diişmekelri, angılarını temsil ederlär giriştirmää seçim kodeksinä. Onnarın aralarında lafın ”yaşamak eri” belli etmesi. Hep ölä koyulu plana giriştirmää diişmekleri 38 statyasına, ne baalı Gagauziyanın seçicilerin reestrusunnan. Teklif ediler onu doldurmaa lafbirleşmesinnän “insanın kimnii”, urguladı Georgiy Leyçu.
«Eеr geçärsäydilär GHT seçimnär listeya girerlär sade vatandaşlar, angıları Gagauziyada seçim gününä karşı üç yıl yaşȇȇrlar. Yok ediler o yannışlık da, angısı praktikada kullanılmȇȇ. İkinci tur için kullanȇrlar hep o listeleri hem eklemäk listeleri, angılarını herbir tur için ayırı- ayırı kurulȇrlar. Bunu praktikada herzaman kullanardılar, ama kanon uurunda kabletmedilär»,- o urguladı.
Teklif edildilär diişmeklär, angıları baalı seçim gününnän. Gagauziya Temel kanonunda söleniler, ani seçimnär geçerlär ilk pazar günü, ondan sora, nicä GHT iş vakıdı bitti.
«Sebeplär açık datanın belli etmesindä görünerlär, da biz karşı gelärdik politika krizislarlan bu uurda, açan GHT kendi iş vakıdını diil belli edilän hem uzun vakıda ilerledärdi, ama buna kanon maanalar yoktular. Alarak esaba Gagauziya Temel kanonunu, bölä var nasıl yapmaa sade olarsa hatalı durum. Hep bölä prinţiplär lääzım kullansın, Moldova Parlamentindä dä onnar seçimnär için kodeksinnän bakılȇrlar»,- Georgiy Leyçu nışanandı.
Gagauziya üstiţiya bakannıı ii notaladı hem kendi çıkışlarını belli etti seçim kodeksin diişmekleri için kanon proektindä. Bu iş için haberledi bakannıın başı Pötr Manol: «Bakarak geçmiş seçimnerä hem zorluklara, angılarınnan karşı gelärdilär GHT deputat postuna kandidatlar, bu diişmeklär giriştitilerlär. Bundan kaarä onu yapȇrlar , ki Gagauziya Temel kanonuna koşullarına cuvap etsin. Da biz annȇȇrız, ani bu yok edecek hepsi yalancılık shemaları. Ölä, nicä insannarın getirmesi başka yaşamak erlerinä , ki onnar ses versinnär başka ayırıcı bölümnerindä. Sayȇrız, ani bu diişmeklär yok edeceklär kanon bozulmaklarını GHT seçimnerindä».
Açık seslemeklerin pay alannarı nışannadılar, ani kanon iniţiativası vakıtçasına olȇr, neçin ki hepsdi aklında tutȇrlar bitki seçimneri GHT, açan onnara karşı insannarın yaşamak eri diişilärdi, hem insanın getirmesi seçimnerä gözledilärdi, söledi GHT deputatı Vladimir Kıssa.
«Sayȇrım, ani bölä başka diil lääzım olsun. Bu işleri kanon uurunda kabletmää lääzım»,- söledi Vladimir Kıssa.
Hepsi tekliflär, angıları açıklandılar seslemeklerdä, alınacȇklar esaba, nışannadılar pay alıcılar.