Komratta üç günün süresindä devlet uurunda şahmata turnirı geçti. Türlü yaş kategoriyalarda sportçular pay aldılar . Yarışmalara sportçular devletin çoyu dolaylarından geldilär. Priz erlerinä çıkannar diplomaları hem para baaşışlarını kablettilär.
Regional şahmata — şaşki okulunda devlet turnirı 60 uşaktan zeedä topladı. Üç günün süresindä onnar edişär partiya geçirdilär, hem en kaavileri belli ettilär. Yarışmaların pay alannarı nışannadılar, ani bölä turnirlär vererlär kolaylık kendi kuvedini notalamaa hem konkurentını üürenmää, priz erlerini kazanmaa.
«Turnir geçti üüsek uurda, nicä kaavi ölä da ufka oyunculara deyni. Çünkü biz eni becermekleri kazanȇrız. Turnir pek faydalı, fikirimizi kaavileştirer, biz düşüneriz adımnarı yaparkana».
«Bana deyni yarışmalar ii geçtilär, edi partiya oynadım, kazandım 4,5 puan, ikisini taradım, üç partiya tarattım».
«Bän pay aldım turnirdä , kaaviydı konkurentlär, üçär partiya taradım hem tarattım».
Nicä nışannadı şaşki hem şahmata okulu başı İvan Velikoglo pay alannar kendi karakterini, becermeklerini gösterdilär.
«Moldovanın 8 dolayından sportçular geldilär, çekederäk Ungen kasabasından Kagul kasabasınadan. Turnir pek kaavi geçti, konkurenţiya dorulukçuydu, burada sport hem FİDE masterları , kandidatlar hem razrädniklär pay aldılar»,- dedi Velikoglo.
Turnirin geçirmesini tutturdu hem finans tarafından yardım etti geçirmää Komrat administraţıyası. Komrat dolayın başı yardımcısı Nikolay Statov nışannadı, ani uşaklar üüsek uurda kendilerini gösterdilär, büüklär da onnara örnek gibi oldular.
«Biz her yılkı şahmata turnirini geçirdik, neredä uşaklar var nıcä kendi reytingını kaldırsınnar, bu pek ii, geçirdik onu üüsek uurda»,- söledi Nikolay.
Hepsi şahmata turnirin pay alannarı kablettilär diplomnarı hem para baaşışlarını. İlk erleri kazandılar Milanya Zueva, Viktor Stançev, Anna Slavova, Nikita Peev, Alisa Dimitroglo hem Sergey Stefu.
Moldovanın hem Gagauziyanın en mekalı haberleri GRTnın Telegram kanalında!