GHT geçtilär açık seslemeklär diişilmeklerin giriştirmesi için avtonomiyanın Seçim için kodeksinä. Dokumenti işlettirdilär GHT, Bakannık komitetin temsilcileri hem üristlär.
Bakannık komitetin temsilcisi İvan Kolioglo urguladı, ani diişilmeklär Gagauziyanın Seçim için kodeksindä doorulu seçim komisiyaların taa faydalı işinä hem da seçim proţesi taa açık olsun deyni. O nışannadı, nekadar onemni kurmaa herzamankı merkez seçim komisiyasının aparadını, ne verecek kolaylık tutturmaa onun işini diil sade seçimnerin vakıdında, ama seçim arası vakıtta da.
«Merkez seçim komisiya aparadın izmet etmesindä diişilmeklär giriştirili. Biz teklif ederiz hem da GHT deputatları hep ölä teklif ettilär, ki merkez seçim komisiyanın aparadı olsun. Hep ölä biz sayȇrız, ani Merkez seçim komisiyası lääzım herzaman olsun. Elbetki Merkez seçim komisiyanın azaları lääzım işlesinnär sade seçim kompaniayaların vakıdında, ama var iş seçim periodundan kaarä. Bunun için lääzım olsun komisiyanın aparadı. Ko o olsun bir iki kişi, ama olsun»,- nışannadı İvan Kolioglo.
GHT deputatı Vladimir Kıssa nışannadı, ani aftanın sonunadan koyulu plana kurmaa maasuz komisiyayi derindän üürenmää deyni hepsi diişimekleri hem ileriya dooru adımnarı yapmaa kanonu kabletmää deyni. O urguladı, ani kanon proektin kabletmesi lääzımnı, neçinki yaklaşȇrlar seçimnär.
«İsteerim nışannamaa, ani biz üürendik çıkışları, hem üstiţiya hem Bakannık komiteti hem da komisiya savaştı koymaa onnarı diişilmeklerin arasına, ama biz kablettik sizin diişilmeklerini da bän düşünerim, ani aftanın sonunadan geçerecez komisiya oturuşunu, neredä hepsini bakacȇz da gidecez ileriya dooru proţeduraya görä. Biz lääızm naşey sa yapalım hem kodeksi kabledelim. Yaklaşȇrlar seçimnär. Biz hepsinnän kayılız, düşünmeerim, ani daartışmaklar deputalrın arasında olaceklar»,- Vladimir Kıssa nışannadı.
GHT başın yardımcısı Georgiy Leyçu şükür etti hepsini, kim katıldı kanon proektin işlettirmesinä, nışannayıp, ani diişeklär lääzım yardımcı olsunnar kurmaa uygun hem normalara cuvap edän dokumenti.
«Bän şansora üçüncü keret urgulȇrım, ani yapılmış işin baş neeti kurmaa normal koşulları, ki bizim vatandaşlarımız kendi seçim haklarını yapabilsinnär. Hem da üüseltmää seçim organnarın işini»,- viţe-spiker Georgiy Leyçu nışannadı.
Gagauziyanın seçim kodeksi- bu kanon aktı, angısı kontrol eder seçimnerin hem referendumnarın geçirmesini.
Moldovanın hem Gagauziyanın en mekalı haberleri GRTnın Telegram kanalında!