Soţial baalantılarında peydalandı video, angısında Diveç ateş kurtarcılara Komratta yanmazdı, ateşin erinä işidilärdi sade gaz şıpırtısı. Bu dalgalandırttı yaşayannarı. Ne bunun için söledilär erli kuvetlär üürendi Natalya Andrieş.
Nicä belli oldu, bir gün taa ileri fevralin 23-dä ateş yanardı, ama şindiki zaman onu genä sündürdülär. Komrat kasaba primarı Sergey Anastasov annattı, ani ateşi bir zamana sündürdülär da bu var nasıl baalı olsun profilaktika işlerinnän.
«Bir vakıda onu sündürdülär yada profilaktika yaptılar. Biz vereriz kolaylıı, ki o herzaman yansın»,- Sergey Anastasov annattı.
«Moldova- gaz» kompaniyasnda haberledilär, ani onnar pek hızlı bölä olaylara çıkȇrlar da problemaları vakıtçasına çözerlär.
«Eer ateş sündüysädi, bizim brigadamız çıkȇr olayın erinä. Uzun vakıda ateşi sündürmedilär hem da yoktu izin bu iş için»,- Anastasov annattı.
Zanaatçılar nışannȇȇrlar, ani ateşin sünmesi var nasıl baalı olsun trubalarda küçük gaz verilmesinnän yada yalın fitilleri tıkandılar. Diveç ateşin izmet etmesinä Komrat kasabasının bücetindän veriler 50 bin ley yılda, nışanandı primar.
«Biz harçları bizim bücetä koyȇrız. Biz onnarı transfert gibi yazȇrız, taa sora bizä bu finansları Moldovagaz kurumu geeri verer»,- Anastasov annattı.
Diveç ateşin durumunu lääzım dikkat gözletmää neçin ki o hatırın önemni simvolu yazȇerlar soţial baalantılarda yaşayannar.
Moldovanın hem Gagauziyanın en mekalı haberleri GRTnın Telegram kanalında!