Gagauziya M.Maruneviç adına BAM geçti tombarlak masa, angısı adandı Mariya Vasilyevna Maruneviçin 87-cı yaşına.
M.V.Maruneviç gagauz halkının anılmış süreti: bilim adamı, etnograf, üüredici, cümnä hem politika izmetçisi. Onun duuma gününä baaşlanılmış olaylar şan aleyasında onun büstünä çiçekleri koymaktan başladılar. Onda pay aldılar BAM uzmannarı, bilim adamnarı hem aaraştırıcılar, Mariya Vasilyevnanın dostları.
«Biz bu günü her yıl nışannȇȇrız, çünkü halkın aklısında tutmakları işlerdän çekilerlär. Anılmış adamnarı anmak, zamandaş Gagauziyanın temelindä bulunan insannarı anmak, büünkü yolumuzun temelini koyannarı anmak-bizim borcumuz. Ki genç evlatlarımız bilsinnär, tutsunnar aklılarında hem örnek alsınnar bu insannardan, kurarkan kendi geleceeni»,- söledi Vitaliy Boyko.
Bilim uurunda çalışarak, Mariya Maruneviç pay aldı türlü halklararası simpoziumnarda hem konferenţiyalarda. O yılların süresindä tipardan çıktı onun 30 bilim işi hem 3 monografiyası.
«Bütün onun bilim işin yolunda büük izmet var. O pek çalışkandı, inanılmaz çok işläärdi. Eer bularsa ihlam, gecelärlän da çalışardı. O toplaardı unikal materialları gagauzların kulturası için. Pek becerikli arhiv materiallarını toplayıp, işledärdi. O beklemäzdi kimsa onu metetsin. Bek açık bir insandı»,- nışannadı Diana Nikoglo.
KDU açılmasınınnan M.Vasilyevna Maruneviç kendisini üüredicilää adadı. Onun teklifinä görä KDU 2 eni zanaat açılȇrlar: “İstoriya” hem “Jurnalistika”.1991-ci yılda milletlär azlıkları Dünnä kongresi süresindä bütün dünneyä açıklȇȇr, ani var bölä halk nıcä gagauzlar.
«O inandırdı hepsinä, ani gagauz karıları da ayledän kaarä , bilimnän hem politikaylan zanaatlansınnar yakışȇrlar. Hazırlanarak büünkü günä, bän kaldırdım o bölümü, neredä laf gider büük adamnarın ödülleri için da esap aldım, ani M.V.Maruneviçtä yok hiç bir dä ödül. Ne Gagauziya ordeni, ne Gagauziya Şannı yaşayanı adı-hiç bir dä ödül. Çoyuna bu ödül öldüktän sora da veriler»,- çizgiledi Svetlana Romanova.
Mariya Vasilyevna topladı hem kurdu “Gagauziya Karıları” cümnä akıntısını. Durardı televizionun kurulması temelindä. 2001-ci yılda Mariya Maruneviç Gagauziya BAM öndercisi olȇr.
«O pek kaavi bir insandı, biz, adamnar, kimär sıra bölä kaavi diiliz. İsteerim annatmaa bir olay, açan Pötr Buzadjiya Luçinskiy sölemiş, ani gagauzlar kendileri kendi istoriyasını lääzım kursunnar. Ozaman Pötr Buzadji, Stepan Topal hem Mihail Kendigelän BAM Moldova Akademiyası gibi kurmaa neetlenerlär. Bu vakıt ta M.Vasilyevma girer, da ondan sora BAM kurulȇr»,- ekledi Födor Kroytor.
Mariya Maruneviçin katkısı için bilim, üüretmäk hem politika uuruna laf gitti Gagauziya M.Maruneviç adına BAM geçirilät tombarlak masa süresindä dä. Oktäbri ayın 25-dä M.V.maruneviç tamannayaceydı 87 yaşını.
Avtor: A.Terzi, operator: S.Georgiev, montaj: İ.Rezuneţ.