Düzmäk işlerindän sora Komrat Kurtarıcılarına anmak taşı açıldı. Onun dolayına koyuldu iki bin kvadrat metrodan zeedä brusçatka, tertiplendi dinnenmäk eri hem da mezarlıklar düzüldü.
Gagauziya Bakannık Komiteti başı ilk yardımcısı İlya Uzun çizgiledi, ani bölä datalar hem da anmak erlär getirerlär hepsinin aklılarına istoriya anmasının önemniini. Onun laflarına görä, yaşayannar mutlaka lääzım yaklaşsınnar bu olaylara büük saygılıklan.
«Büün — anmak taşı genä açıldı bizim Komrat kasabasının yaşayannarı için hem misafirleri için. 1975 — ci yıldan, burada yapılmadılar derindän düzmäk işleri, da büün, onnarlan yıl geçtikçä, bu anılmış anmak köşesi enilendi»,- İlya Uzun çizgiledi.
Gagauziya Bakannık Komiteti başı yardımcısı Viktor Petrov nışanandı, ani pek önemni görmää barabar işin.
«Büün pek önemni data bizim kasabamız için, bizim halkımız için. Pek önemni büün bilmää istoriyayı, geçirmää ileri dooru, korumaa hem da saymaa. Kendi tarafımdan isteerim sölemää, ani baş ilderim bu kahramannarın önnerindä, angıları kaldılar bizim toprakta, kurtarıp bizim topraa»,- Viktor Petrov nışanandı.
Gagauziya dış baalantılar Bakanı öndercisi Yuriy Kuzneţov nışannadı, ani Başkanın komandası yapacek hepsini, ki bölä proektlär giriştirilsinnär sık ileri dooru da.
«Bölä günneri biz mutlaka lääzım aklımızda tutalım, bölä günnerdä biz mutlaka lääzım gelelim anmak taşlarına, anmaa deyni bizim babuları hem da däduları, neçinki maasuz onnarın hatırınnan, biz büün yaşȇȇrız açık gök altnda»,- Yuriy Kuzneţov nışannadı.
Gagauziya Şannı jurnalisti Anna Jekova paylaştı duygularınnan, nışannayıp, ani pek zor sölemää laflarlan, bulunup anmak taşın yanında. Onun laflatına görä, bölä dataları mutlaka lääzım aklımızda tutmaa hem da saymaa, koruyup, saygılı geçän zamanın anması için.
«Yok nasıl açıklamaa duyguları, angıları benim içimdän geçerlär, açän bän burayı gelerim. Bän her zaman aklımda tutȇrım kurtarıcıların laflarını, angıları bizä gelärdilär, hem da onnarın hısımnarını. Onnar her zaman yalvarardılar bir iş için — nekadar da yıl geçmesin, kär o zaman da, açan biz olmayacez bu dünnedä — gelmää mayın 9 — da hem da avgustun 23 — dä, da baş urmaa onnar için. Bän büün pek sevinerim, ani anmak taşı enilendi, ani biz hepsinä haberledik, ani biz buradayız, biz tutȇrız onnarı aklımızda, kim verdi kendi cannarını, baş ilderiz onnara»,- urguladı Jekova.
Toplantının pay alannarı çizgiledilär, ani enilenmiş anmak taşı oldu anmak simvolu gibi, şükür etmäk hem saymak için o insannara, angıları başladılar usluluk gelän evlat boylarına.
Avtor: P. Barbova, O. Lotka, P. Slavova, operator: Gr. Stavilov, montaj: A. Gerçu
Moldovanın hem Gagauziyanın en mekalı haberleri GRTnın Telegram kanalında!