Tarakliyada geçti «ENTO FEST» festivali. Kasabanın meydanında toplandı çok musaafirlär Moldovanın türlü dolaylarından, öttü halk türküleri hem gösterildi oyunnar. Gagauziya burada açıkladıll kendi adetlerini hem zenginniini.
Festival başladı halk giimnerin paradından. Burada bulgarlar, gagauzlar, moldovannar, ukrainnär hem taa başka küçük halklar, angıları yaşêêrlar Moldovada. Hepsi kollektivlär kendi oyun yada türkü nomerlarını gösterdilär. Meydanda da hazırlanmıştılar kasabaların hem küülerin erleri. Burada Gagauziyayı gösterdilär Komrat, Kongaz, Çadır hem Kıpçak. Musaafirleri tuzlan ekmeklän kaarşıladılar. Gagauziyanın kultura bakannıı hazırladı hem gösterdi hepsinä evelki gagauz adetini — süpürgä baalamasını. Bölä festivallerdä pay almanın önemnii için söledi Gagauziya kultura bakanı Marina Semönova: «Bizim var kolayımız göstermää, ani gagauz halkın kulturası geniş gözäl, şıralı derin maanalı, biz her yıl geleriz, nesä eni savaşȇrız göstermää. Eni oyun mu, türkü mü, adet mi, master-klass mı, eni imeklerdän savaşȇrız dattırmaa. Büün burada türlü halklar, var bulgarlar da, ruslar da, ukrainnär da var, moldvannar da, biz da hepsiciin arasında savaşȇrız göstermää kendi kulturamızı!»
«Pek önemni, ki gagauz halkın zenginnii — adetleri, geçsinnär genç evlad boylarına hem korunsunnar», urguladı Gagauziya başkan işleri bakanı İvan Kolioglo: «Bizim Moldovamız çok halklı devlet, hepsicii bakmayarak nesoy milllettän çıkêr, hepsi isteer yaşamaa biri-birinnän dostlukta».
Festivaldä üüsek musaafir oldu Bulgariya viţe -prezidenti İliana Yotova. O nışannadı, ani bölä olaylar kaavilederlär baalantıyı hem dostluu hakların aralarında.
«Tarakliya -o bir er, neredä korunêr halk ruhu hem zenginnii. Burada koruyêrlar ayläylän baalı akılına getirmeleri, adetlär geçirilerlär evladlara hem korunêr dil»,- İliana Yotova urguladı.
Tarakliya dolayın başı Lazar Dermenji söledi, ani bu etnofestival taa sıkı yapêr baalantıları Moldovanın hepsi yaşayannarın arasında.
«Bu festival oldu pek önemni Moldovanın kultura uuru için hem Tarakliya dolayı için. O hep taa genişleder kendi sınırlarını, taa çok pay alannar olêrlar türlü halklardan»,- Lazar Dermenji söledi.
Bu yıl etnofestivalä katıldı 70 master, sţenada kendi kulturasını gösterdi 28 kolektiv, meydanda da 30 küü hem kasaba gösteriliydi.
Avtor: A. Karapirä, operator hem montaj: L. Arfonos
Moldovanın hem Gagauziyanın en mekalı haberleri GRTnın Telegram kanalında!