Kazayak küüyün gimnaziyasında gagauz dilindä «Ekmek dünneyi tutêr» tematikalı olay geçti. Anna Karapirä üürendi onun maanasını.
Üürenicilär meraklı hem maanalı programayı hazırlamışlar. Ona girdilär yaradıcılık göstermekleri, şiirlär, türkülär, angılarında laf gidärdi ekmään önemni için hem saygı için o insannara, kim büüder terekeyi. Uşaklar çalıştılar baş maanayı açıklamaa, ani ekmek herzaman yaşamak için önemni kalêr. Üürenicilär nışannadılar, ani bölä olaylar yardım ederlär taa derindän annamaa ekmään paasını.
«Herbir kişinin var kendi paalılıkları. Bana deyni ekmek — o yaşamak. Hem insanın arasında deerlär: « Ekmek o yaşamak» — ölä da var. Ekmeksiz yasamak olmaz».
«Ekmek- o dünnenin temeli, angısı verer kuvet hem yaşamak».
Olayın kurucuları nışannadılar — küçük evlad boylarına bu önemniklär için lääzım taa nekadar erken annatmaa. Gagauz dili üüredicisi Kazayak gimnaziyasından Svetlana Dülger söledi buluşmanın baş neeti için.
«Neçin aldık bu temayı — ekmek en önemni bu yaşamakta. O dünnenin temeli. Biz uşaklarlan isteeriz göstermää, nicä bizim gagauzlar eveldän savaşarmıştılar büütmää ekmää da te o ekmek gelärmişti bizim sofraya. Biz göstereriz harman nicä düüler, biz göstereriz, nicä pişer ekmek, nesoy ekmek var. Musaafirliktä insannar, angısınnar baalı çiftçilik zanaatınnan»,- Svetlana Dülger söledi.
Ayırı musaafir bu olayda Stepan Kalak — o çok yıl kumbaynada çalışmış. Bu adam annattı uşaklara nesoy yolu geçer terekä ekmek olunca. Stepan Kalak urguladı, ani lääzım çok teer dökmää, ki bereketi toplamaa.
«Söleerim sizä, ani ekmek toplamaa — o diil kolay iş, orada lääzım işlemää, orada lääzım teer dökmää, gecelärlän uyumamaa. Aldık zanaatımızı bobamızdan, o işlemiş 1952-dän 89-zadan. Şindi dä oolum işleer, o da götürer o tradiţiyayı — sürer, eker, meralarda büüder ekmek. Onnarı lääzım üüretmää uşaklarımızı, olsun kim büüdecek,kim sürecek toprakları, kim toplayacek. Onnarı lääzım üüretmää, uşaklar bilsin, te nicä bizi üürettilär»,- Stepan Kalak urguladı.
Bölä olaylar vererlär kolaylık uşaklarda terbi etmää saygıyı o insannara, kim kırda çalışêr hem teneyi büüder. Bundan kaarä bu olay belli etti,ani bölä önemni zenginniklär için uşaklara taa küçüktän lääzım annatmaa.
Avtor: A. Karapirä, operator hem montaj: L. Arfonos
Moldovanın hem Gagauziyanın en mekalı haberleri GRTnın Telegram kanalında!