Suuk havalar başladıynan insannar evlerini yısıtmaa deyni türlü elektrika tertilerini kullanmaa çekederlär. Bu durumda korunmak kuralların kullanılması taa pek aktual olȇr. Çünkü elektrika tertiplerin diil dooru kullanılması var nasıl hatalı olaylara getirsin.
Güzün hem kışın, açan havalar suuk olȇr insannar evlerini yısıtmaa deyni elektrika tertilerini kullanmaa çekederlär. Bu özel kurallara görä yapılsın lääzım, söleerlär uzmannar. Elektrika tertipleri islää halda olsunnar lääzım, razetkaların da halı islää olsun lääzım. Er bölä diilsä, provodlar erimää var nasıl başlasınnar, neyin beterinä yangın çeketsin var nasıl, söleer Gagauziya hatalı olaylar bakannıın ofiţeri, leytenant Ruslan Mazurenko.
«Kurallar kullanılmarsa hatalı olay var nicä olsu. Yangın başladıynan içer zihirli gazlan dolȇr. Bu pek hatalı. İnsan var nicä otalansın, bunalsın. Var nicä ölsün dä»,- söleer Ruslan Mazurenko.
Biz sorduk Gagauziyanın yaşayannarına, dikkatlı mı onnar elektrika tertiplerini kullanȇrlar. Çoyu söledilär, ani göz altında tutȇrlar bu tertiplerin halını hem gecä için onnarı rozetkada koşulu brakmȇȇrlar.
«Elektrik batareyasını kullanȇrız. Ama onun yanından ayırılmȇȇrım. Gecä i sündürerim. Allaa korusun, yangın olmasın».
«Elbetki kullanȇrız. Var kompyuter, kondiţioner, ütü, televizor. Hepsi var. Savaşȇrız hepsini sündürmää. Bişey koşulu unutmamaa».
«Savaşȇrız hepsini vakıdında sündürmää. Kär koştuysam da mikrovolnovkayı, durȇrım yanında. Bekleerim. Rozetkadan çıkarȇrım».
«Dikkatlı kullanȇrız. Bakȇrız, ki hepsi tertiplär iş halında olsunnar».
«Çok para harcanmasın deyni kaminı çok vakıda koşmȇȇrız», — söledi yaşlı kaarı.
«Ya kotöl, ya kamin. Yok para hem onu, hem bunu kullanmaa. Kimär keret suukta da oturȇrız. Savaşȇrız pek çok kullanmamaa. Pensiyalar pek küçük».
Gagauziya hatalı olaylar bakannıın ofiţeri, leytenant Ruslan Mazurenko nasaat eder bir rozetkaya birdän çok elektrika tertibini koşmamaa.
«Bir rozetkada çok elktrik tertibini koşmaa olmaz. Bu beterä hatalı olay var nasıl olsun»,- Ruslan Mazurenko nasaat eder .
Gagauz Erin yaşayannarı çizgiledilär, ani uşaklarına önemni kuralları annadȇrlar. Üürederlär onnarı elektrik tertiplerini dooru kulanmaa.
«Söleeriz uşaklara, ani elektrik tertiplerini mutlak sündürmää lääzım. Çizgileeriz, ani dikkat olmaa lääzım, ani ellerin kuru olsun lääzım».
Gagauziya hatalı olaylar bakannıın ofiţeri, leytenant Ruslan Mazurenko çizgiledi, ani uşaklara bu kuralları annatmaa önemni. Butakım onun bakışına görä, hatalı olayların sayısı iisiler.